Angay g’yud nga ang kadagkoan sa Cebu City Transportation Office (CCTO) magmugna og ilang grupo nga motrabaho isip clearing team aron paghawan sa mga karsada nga giukopar sa mga tawo nga mapahimuslanon sa higayon.
Kon kining akong sugyot tumanon ni higalang Isko Ouano, ang hepe sa operations branch sa CCTO, mapanglantawan nako nga makatabang kini nga mohapsay ang mga karsada dinhi sa dakbayan sa Sugbo. Karon gud, daghang tawo nga miabuso sa atong mga karsada ug gipasagdan ra.
Mga tawo nga migamit sa karsada para sa kaugalingon nilang interes, sama sa pagbutang og mga tangkal sa manok, pagbutang og mga lamesa nga gigamit isip butangan sa ilang baligya, mga scrap nga puthaw anaa nila diha bungkagon ug ubang abuso nga binuhatan.
Apil sa mga karsada nga giabusohan lang mao ang kabahin sa C. Padilla Street gikan sa eskina Espelita ug Tres de Abril Street paingon sa simbahan sa San Nicolas de Tolentino. Giaspalto sa kagamhanan ang maong karsada, apan wala kini kapahimusli para sa mga sakyanan kay giukopar man kini sa mga tawo.
Walay kalainan sa mga buta ang mga traffic enforcer ug ang mga opisyal sa kagamhanan nga mag-agi-agi diha sa maong dapit kay tabla ra nga wala sila makakita sa maong talan-awon. Mahimo sab nga wala moandar ang ilang utok kon unsay angay’ng buhaton.
“Four lanes” ang C. Padilla, ang duha alang sa mga mopaingon sa south, ug duha sab unta alang sa mga sakyanan nga mopaingon sa Colon, o kaha kadtong motipas paingon sa Magallanes. Apan usa ra ka “lane” ang magamit sa mga sakyanan nga mopaingon sa Colon, kay ang usa ka “lane” giukopar sa mga mapahimuslanon. Unya, husto ba diay ni?
Diha sab sa North Reclamation Area (NRA) may karsada sab nga duol sa baligyaanan og mga scrap, gigamit sab sa mga scrap buyer. Angay nga kadtong mga nangatungdanan sa kagamhanan manalipod unta aron nga dili kaabusohan ang atong mga butang sa gobiyerno.
* * *
Wala g’yuy nahimo ang Cebu City Hall, ilabi na ang opisina sa City Planning and Development Office (CPDO) ug ang Office of the Building Official (OBO) batok sa mga nagtukod og ilegal nga estraktura nga wala motuman sa gilatid nga setback.
Karon gipintalan na ang gitukod nga tindahan. Sa ato pa, maayo lang kining OBO sa motuman sa lagda? Kon magpaugat diay, wala sila’y mahimo. Utro pa kining kapitan sa Barangay Santo Niño nga si Pancho Ramirez kay miisyu man sab diay og clearance. Ambot ngano kaha nga miisyu man siya.