Sa pagbukas pa lang sa atong mga social media account, makita nato ang nagbaha nga kasayuran sa atong newsfeed.
Apan dili tanan tinuod, sanglit mikuyanap niini ang virus, dili sa mga gadgets, kondili, kagaw nga makainpluwensiya sa panghunahuna sa mga tawo.
Kini ang “infovirus” o mas naila nato nga fake news, nga mura’g maka-hypnotize sa mga tawo, ilabi na g’yud kadtong mga “freedatards” o nagsalig sa free data nga ang headlines lang ang mabasa sa ilang newsfeed.
Ang nakaparat ra ba kay maayo kaayo mohatag og analysis kining mga tawhana nga mura’g sila na ang eksperto sa tanan. Ang mas nakapait pa kay ibase nila ang tanan sa sayop nga balita nga ilang nabasahan sa social media.
Niadtong nakalabay’ng semana, mibuto sa social media ang fake rice kuno nga gipamaligya sa merkado didto sa lungsod sa Santa Fe.
Gawas sa bugas, may fake usab kuno nga repolyo, ug uban pa nga produkto sa pagkaon diin na-feature pa kini sa national television.
Apan base sa pagsusi sa mga eksperto, dili fake rice ang naunang gireklamo nga bugas. Sa una nga wala pa mauso ang social media, wala may nanggawas nga balita sa fake rice, karon na man lang kini nga nauso na ang social media.
Wala’y fake rice apan naay fake news nga sama sa kagaw nga mokulikot sa utok sa mga tawo nga mas motuo pa sa mga bakak nga kasayuran nga ilang masagap.