Kinahanglan gayud nga masayod kita sa kinaiya sa mga nagmalampuson, kay wala’y tawo nga gusto mapakyas sa atong pakigbisog niining kinabuhia. Ania atong ipadayon nga seryosuhon nga kakuhaan kini og ideya, iyawat sab nga kita magmalampuson.
* Nakighugoy sa uban – sa pagdayeg ug pagkomplimento sa ilang katakus. Morespeto sa ilang pagkatawo, kay sila mahimong kapuslan nga makatabang kanato sa pagpalig-on sa atong gitinguha nga kalampusan.
* Naghimo og listahan – sa tanan nga nakahan-ay nga buhaton, nga masubay ang mga gilaraw, aron molampos.
* Nakahibalo sa tumong – nga pirme gitutokan ang misyon sa paglampus aron dili masaag sa padulngan nga tumong sumala sa gipangandoy.
* Malipay kun ang uban molampos – dili hakog nga mopaambit sa iyang katakus nga motabang sa uban nga magmalampuson kay maoy pagtuo nga kun molampos sila, mas labaw pa siya nga makahimo niini.
* Modawat og kapildehan – nga himuon nga puhonan, aron masustenihan ang kausaban sa pakigbisog nga modaug. Dili motagam kay kusog kini nga mopalugway sa lahutay.
* Nagdilaab nga tinguha – pirme mainiton sa paghangop nga ang tinguha molampos gayud. Dili dali masubhan sa kabugnaw, kun dili, labi pa nga molig-on. Taas og paglaum, bisa’g tumbasan ni og kinabuhi, pakatam-ison ang kasakit.
* May dedikasyon ug pasyon – sa trabaho maunongon, dili mobatyag og kakapoy bisan og kaugtason na. Basta nakatutok lang nga madaugon sa unahan.
* Permi nagbasa ug nagtuon – padayon sa tanang higayon, sa wa’y kapuol aron lang pag-umol og mga bag-ong ideya, nga ikatampo sa kalampusan.