Katuohan ba nga si Superintendent Ma. Cristina Nobleza usa ka “deep penetration agent” sa kagamhanan ug gipasulod aron panid-an ang grupo nga Abu Sayyaf?
Dili gyud ko makatuo niini tungod kay bisan gani ang hepe sa Philippine National Police (PNP) nga si Director General Ronald “Bato” Dela Rosa mitataw na nga wala siya masayod nga dunay polis nga gigamit isip DPA ngadto sa Abu Sayyaf Group.
Ang mga ingon niini nga gimbuhaton sa kapolisan pagdestino og DPA aron masayran ang kalihukan sa kontra magkinahanglan og pagtugot sa labaw’ng opisyal sa PNP. Imposible nga si Dela Rosa dili pahibaw-on?
Buyno, ibutang nato nga tinuod nga si Superintendent Nobleza usa ka DPA, unsa may inpormasyon nga iyang nahatag aron nga masumpo ang kalihukan sa mga bandidong grupo? Ngano nga sa iyang gipuy-ang apartment nasakmitan man gani og sangkap sa mga pagpamomba?
Ngano nga mitugot man hinoon si Superintendent Nobleza nga mapangasawa sa usa ka terorista nga nag-atubang pa gani og double murder nga kaso human siya nag-Balik Islam? Ngano nga miuban man unta siya sa iyang bag-ong bana aron tabangan ang mga sakop sa Abu Sayyaf?
Bisan si Dela Rosa nakasabot nga nagsugod nga nahulog ang pagbati ni Nobleza ngadto sa terorista nga si Reneer Lou Dongon diha nga siya maoy gitahasan kaniadto sa pagsukit-sukit niini human kini madakpi.
Gikuyawan ko nga adunay ubang opisyal sa kapolisan nga posibleng tigpanalipod usab sa Abu Sayyaf nga maoy mohimo og scenario aron nga mogawas nga si Nobleza nagtuman lang sa tahas isip DPA.
Angay’ng magbantay niini si General Dela Rosa kay basin og apil siya nga malingla. Higayon na kini nga karong nabulgar na ang giingong kalambigitan ni Nobleza sa kalihukan sa Abu Sayyaf, mabutyag usab ang ubang opisyal.
Unya, angay’ng dili gayud magpalingla ang kapolisan ug militar kay dili imposible nga ang Abu Sayyaf mohimo og paagi aron ma-divert ang atensyon sa mga tropa sa kagamhanan ug dili na kaayo sila makabantay sa kabukiran sa Bohol ug makaikyas ang tulo ka Abu Sayyaf nga karon sigurado na nga maluyahon.