Akong klaruhon nga wala sab gyud ko makagusto kaniadto atol sa termino ni kanhi mayor Michael Rama nga ang gihatagan og grabeng pagtagad atol sa pagsaulog sa Charter Day, mao ra gyud si Don Vicente Rama, ang apohan sa kanhi mayor.
Daghang maayong himoon aron nga ang pagsaulog sa Charter Day sa dakbayan mahimong nindot ug maghubit sa makasaysayanong mga panghitabo. Sama sa gihimo sa kadagkoan sa administrasyon ni Mayor Tomas Osmeña nga gipasidunggan si kanhi konsehal Gervacio Lavilles.
Bisan ako wala makaila kang Lavilles. Husto man ang gihimo ni Osmeña nga gipasidunggan si Lavilles tungod kay diha nga lungsod pa kaniadto ang Sugbo, siya diay ang mihimo og resolusyon kaniadtong 1931 nga nag-awhag sa Kongreso ug Senado nga himoan og balaudnon nga himoong siyudad ang Pueblo Sugbo.
Kini maoy gibasehan sa Sugboanong senador nga si Vicente Rama pagduso og balaudnon nga himoong siyudad ang Sugbo nga kaniadto usa lang ka lungsod. Walay lalis nga si Lavilles angay’ng pasidunggan.
Apan, kinahanglan usab unta nga ihiklin og gamay ni Mayor Osmeña ang iyang kasuko ngadto sa iyang higpit nga kontra sa politika nga si kanhi mayor Rama. Kun ako maoy mayor, pasidunggan nako silang duha si Gervacio Lavilles ug si Vicente Rama.
Mag-unsa man ang resolusyon ni Lavilles ngadto sa Kongreso ug Senado kun wala kini himoi og lakang ni Vicente Rama? Ang nakadaot gud, kay atol sa termino ni Rama kaniadto, mura’g ang Charter Day sa dakbayan maoy birthday sa iyang apohan.
Nahinumdom ba kamo nga hapit ang tanang mga electric posts taliwala sa mga dagkong karsada dinhi sa dakbayan, adunay mga hulagway ni Vicente Rama? Angay usab nga pasidunggan si Serging Osmeña, nga amahan ni Tommy, kay mao kini ang unang mayor sa Sugbo sa pagkahimo na nga siyudad.
* * *
May nabantayan lang ko. Atol sa termino ni kanhi mayor Rama kaniadto, dagko kaayo ang budget nga gigahin sa pagsaulog sa Charter Day, apan nganong mga plastik ra man intawon ang mga plaques nga gipanghatag sa mga awardees?
Kaniadtong miaging gabii, atol sa pagsaulog sa ika-80 ka tuig nga Charter Day, dili kaayo dako ang budget apan pwerteng nindota sa mga plaque nga gipanghatag ngadto sa mga awardees.
Samtang nagtan-aw ko sa mga nindot kaayong plaque, wala kapugngi sa akong huna-huna ang usa ka pangutana. “Wala kaha’y nakakuwarta sa dako kaayong budget atol sa maong higayon?”
* * *
Congrats diay sa mga sakop sa Task Force Alpha kay gipasidunggan sila sa mayor atol sa Charter Day tungod sa ilang pagtabang sa pagpahapsay sa trapiko bisan og walay sweldo.