Sa niaging semana, niadto ako sa isla sa Bantayan dihang dunay nangimbitar kanako alang sa usa ka speaking engagement sa usa ka pampublikong tunghaan didto sa lungsod sa Madridejos, ang ikatulo o katapusang lungsod sa isla.
Unang higayon ko nga nakataak sa naasoy’ng dapit nga usa sa grabeng gigusbat sa super typhoon Yolanda niadtong tuig 2013. Wala na ang anino sa grabeng katalagman human nga inanay’ng nakabangon ang mga residente sa tulo ka isla nga naglangkob sa Sta. Fe, Bantayan proper ug Madridejos.
Bisan pa man sa kagamay sa naasoy’ng isla, apan makita ang dakong paglambo niini, diin nindot ang mga balay nga akong nakit-an atol sa akong pagbiyahe. Sukwahi kini sa akong imahinasyon nga basin og mga laksot pa ang talan-awon gumikan sa gibilin sa kalamidad.
Yano kaayo ang kinabuhi ug panginabuhi sa mga residente. Mas na- amaze ko didto sa Madridejos, sanglit alas 6 pa sa gabii, mingaw na kaayo ang palibot sa lungsod.
Matud pa nga naandan na nga sayo mamahulay ang katawhan didto, ilabi na kadtong mga asawa ug mga anak nga nahabilin sa pinuy-anan sanglit ang kalalakin-an moadto man sa lawod aron mangisda.
Gipangutana nako ang desk officer sa Madridejos PNP kalabot sa crime rate nila, mga hubog-hubog lang ang ilang natala. Hinoon, dili exempted ang lungsod sa problema sa illegal drugs kay aduna gihapoy mga barangay nga gihugpaan.
Apan menus ra kuno tungod sa hingusog nilang kampanya. Barato ra usab kaayo ang mga produkto nila, sama sa itlog ug isda ilabi na ang lamian nga bulad. Nindot unta kaayo ipangumpra kun naa pa koy daghang kuwarta. Ang mga matahum nga beach, ilabi na sa silingan nga lungsod sa Sta. Fe, ang wala’y lalis nga makabibihag gumikan sa mura’g asukar nga kolor sa balas. Anugon lang kay hagip-ot ra kaayo ang panahon sa pagbisita nako sa maong dapit.
Labaw sa tanan, ang tiunay nga kinaiya sa mga tawo nga moabi-abi sa mga dumuduong nga sama nako nga dili magduhaduha sa pagbalik sa makabibihag nga isla.