Gidapit ko sa mga taga USC South Campus alang sa ilang Triduum pahinungod kang San Juan Pablo Segundo. Ang maong tema nga maoy ulohan ning atong pamalandong karon nakapahinumdom kanako sa esena diin si San Juan Pablo Segundo ang niduaw gani sa iyang assassin nga si Agca sa gibilanggoan niini. Pagpakita sa tinud-anay nga kahulogan sa pasaylo ug kalooy sa tawo nga buot untang mohunos sa iyang kinabuhi. Ning atong panahon karon, nahimong nisilaob ang kalayo sa kasuko ug panimawos. Kini tungod kay ang tawo nahimong pintas ug bangis gumikan lang pud sa iyang isigkaingon. Mao nga usa ka dakong kalisdanan ang pagsabot sa Diosnong kalooy tungod kay ang kalibutan mismo dili man maloloy-on. Ang kalooy dili lang pagbati. Ang kalooy usa ka desisyon nga angayang himoon pinasikad sa rason.