Karong bag-o na ang presidente sa Amerika pinaagi ni President-elect Donald Trump, daghan ang Filipino nga atoa didto nga padayon pa nga nagproseso sa ilang mga papeles aron mahimong permanenteng residente, ang gibati og kabalaka. Kini tungod sa gihulagway sa mga kritiko ni Trump nga “divisive stance” niini sa mga partikular nga isyu nga giatubang karon sa ilang nasud, sama sa imigrasyon, seguridad, foreign policies, terorismo, ekonomiya ug uban pa.
Si Trump may pagkaparehas og estilo ni Presidente Duterte gikan sa kampanya pa lang, wala sab siya’y panapo kun makaestorya hinungdan nga daghan ang miisa ang kilay apan daghan usab ang mga nakauyon sa iyang pangandoy para sa Amerika.
Ang kalainan lang sa duha, si Duterte popular tungod sa iyang pagkamayor didto sa Davao City diin iyang gipakita nga kinahanglan gyud og disiplina ang mga tawo pinaagi sa maayong pagdumala, samtang si Trump, nabantog sa iyang pagkamalampuson sa iyang negosyo. Karon nagpaabot ang katawhan sa Amerika kun unsay unang buhaton ni Trump pagdumala sa ilang nasud kun iya ba nga buhaton ang iyang mga gipanaad para sa iyang mga supporters ug ingon man sa mga dili niya supporters, bati man o maayo sa duha ka habig.
Numero uno nga maapektohan niini kining milyones ka immigrants sa US, apil na ang mga Filipino, nga nanarbaho karon didto.
Gihulagway sila ni Trump nga kakompetensiya sa mga natural-born Americans sa pagpanarbaho. Nagpasabot ba kini nga aduna gyud unya’y mga Filipino nga mawagtangan og oportunidad nga makatrabaho o ba kaha matangtang gyud sa trabaho kun usbon ang palisiya nga prayoridad ang mga puti sa pagpanarbaho?
Mag-unsa na man lang ang mga Filipino didto? Mao baya ni ang hinungdan ngano nga nitaak sila didto sa gawas aron nga mahimong mas maayo ang kahimtang sa pagpanarbaho, kun itandi dinhi.
Kun ingon niini ang mahitabo sa mosunod nga upat ka tuig samtang naglingkod si Trump, mas maayo siguro nga tipigan na lang una kining gitawag sa tanan nga “The Great American Dream.”