Dihang nanawag si kanhi Cebu City mayor Mike Rama sa Arangkada sa DYAB Abante Pa, Bisaya! sa niaging semana, usa ka adlaw human namo nahinabi si Mayor Tommy Osmeña sa kahigayonan nga ipasira gyud sa Court of Appeals (CA) ug sa Department of Environment and Natural Resources (DENR) ang basurahan sa Inayawan, kaingon nako nga mohatag siya og dugang katin-awan sa kontrobersiya.
Kaingon nako nga may mahinungdanong kasayuran nga wa mahisgoti sa mga protagonista, silang Osmeña ug Konsehal Joel Garganera nga maoy nipasaka sa petisyon sa Writ of Kalikasan sa CA, nga si Rama ra ang nahibawo nga iyang pakisaw-an sa mga Sugbuanon nga nahasol sa problema sa basura.
* * *
Apan nahugno ko kay way bag-ong mga detalye nga nahatag si Rama sa basurahan nga iyang gipasirad-an sa Enero sa niaging tuig. Dihang amo siyang gipangutana sa gisulti sa DENR nga wa matuman sa pamunoan ni Rama ang mga panginahanglan sa pagtak-op sa landfill, wa siya’y klarong tubag.
Igo lang mi niyang gipasa ngadto ni Atty. Jade Ponce, ang kanhi chairman sa Solid Waste Management Board. Matud ni Rama si Ponce maoy iyang gitahasan sa pagtak-op sa landfill ug busa nisalig siya nga mao say niatiman sa tanang panginahanglan sa pag-rehabilitate sa basurahan, labi na atubangan sa gitanyag nga teknolohiya paghimong kuryente sa mga basura.
* * *
Wa say tubag si Rama sa mga pasangil nga usa sa labing nabulahan sa pagtak-op sa landfill mao ang suod niyang higala nga si Rustom Ignacio, ang kanhi barangay kapitan sa Inayawan, nga maoy iyang gipatuyangan sa pagbahig sa basura ug pagbaligya sa mga napuslan pa dayong hakot ngadto sa Consolacion. Si Ponce gihapon ang gitumbok ni Rama nga makapatin-aw sa transaksiyon uban ni Ignacio.
Mas nahugno ko nga wa say katin-awan si Rama sa laing kontrobersiyal niyang mga transaksiyon – ang pagbayad og minilyon ka pesos sa pribadong landfill sa Consolacion nga way kontrata ug pag-abang og trak sa negosyante nga gawas nga way rehistro wa pa gyuy trak.
* * *
Wa na hinuon mi niya ipasa ni Ponce. Iyang gitumbok ang iyang ig-agaw nga si Konsehal Edu Rama nga maoy iyang gitugyanan sa tanang transaksiyon nga nahilambigit sa paglabay sa basura sa Consolacion.
Bisan sa panginahanglan sa pagtugyan sa pipila ka aspeto sa pagduma sa City Hall ngadto sa iyang mga sinaligan tungod sa kadaghan sa mga gimbuhaton sa mayor, makapahibung ang ka way kasayuran ni Rama sa mga transaksiyon nilang Ponce ug Edu.
Mas makapaalarma nga pila ka buwan human napulihan sa City Hall, nga igo nang kahigayonan pagsubli sa mahinungdanon niyang mga proyekto, wa gihapoy kasayuran si Rama unsay nahitabo sa mga transaksiyon nga gigamit karong Osmeña pagtulisok niya sa krisis sa basura.
* * *