Kanatong mga senior citizen, ambot pila na ka State of the Nation Address (SONA) ang atong nadunggan ug nasinati. Traditionally, dako kini nga event sa atong nasud, mao ra ni og holiday kay kasagaran natong mga lungsuranon, maminaw gyud unsay isugilon kanato sa presidente.
Kahimtang sa nasud, mga suliran ug mga laraw sa pamunoan unsaon pagsulbad sa mga suliran. Ang tanang nangagi nga mga SONA, pulos gyud naghisgot sa kawad-on, ug unsaon nga kabatokan ang kalisud.
Ang nangaging mga SONA, pulos mi-declare og war batok sa poverty. Kinahanglan pulpogon ang kapubrehon, aron magmalambuon ang matag lungsuranon.
Kitang mga senior citizen, saksi nga sa maong pakigbugno batok sa kawad-on, pilde ang atong nasud. We lost the battle against poverty. Ang nahitabo, misamot na hinoon kaut-ot ang atong nasud, mas nidaghan ang gipanggutom.
Karon, lain na usab nga SONA ang atong masaksihan. Gipaabot nga lahi kini nga SONA kay sa unang mga SONA. Sama sa pagpanumpa ni Presidente Digong Duterte, ang SONA karong Lunes, yano kaayo. Walay hataas ug matam-is nga mga pulong.
Among others, ang karon nga SONA dili himoon nga fashion show sa kababayen-an nga motambong; ug dili kinahanglan mag-coat and tie ang kalalakin-an.
Unya aron dili madugay ang presidente sulod sa hawanan sa Kongreso, dili kinahanglan nga ang mga magbabalaod mag-inilogay pagpakiglamano sa presidente.
Gusto ni Duterte, tapus sa event, balik dayon sa trabaho. Gipaabot usab nga simple kaayo ang pagkaon nga idalit, aron dili makagasto og dako ang kagamhanan.
Alang kanatong mga senior citizen, maka-distinguish gyud ta sa kalainan unya sa karon nga SONA kay sa nangaging mga SONA nga atong nasaksihan.
Hinaot nga ang gipasibantog nga change is coming, mo-come ra gyud, muabot ra gyud, tapus sa SONA. Dili sama sa ubang mga SONA nga kutob ra gyud sa SONA.
Sa iyang pakigpulong sa Mindanao Leaders Summit bahin sa Federalism, si Atty. Reuben R. Canoy, kanhi mayor sa Cagayan de Oro, Undersecretary of Information, assemblyman, ug chairman sa Mindanao Development Authority, nagkanayon:
“Today we are certainly no better than we were yesterday. We are besieged by corruption, crime, unemployment, and poverty, and we have become a frightened and frustrated country.”
So, tapus niining SONA sa Lunes puhon, hinaot nga dili na nato masinati ang maong mga suliran nga atong giatubang karon, ug nga unta dili na kita mahimo nga usa ka “frightened and frustrated country,” sumala sa gikahadlokan ni Atty. Canoy.