Dear Atty. Divine,
Duna ko’y pangutana labot sa properties nga among napalit uban sa akong kapuyo. Nakapalit kami og house and lot atol sa among panagpuyo ug duna sa’y laing basakan. Duna kami duha ka anak, apan wa kami makasal. Tiguwang na ang akong kapuyo ug nahadlok ko nga kun adunay mahitabo kaniya, ang iyang mga igsuon mo-claim sa maong properties kay dili man kami kasal. Ang akong pangutana attorney, unsa may katungod nako sa property nga among napalit? Makapanghilabot ba niini ang mga igsuon sa akong bana? Daghang salamat sa imong pagtubag. — Lucelle
Dear Lucelle,
Kun ang inyong panagpuyo wa’y legal nga babag apan bisan pa niini, wala mo magpakasal, apan nagtipon mo susama sa magtiayon ug gani aduna kamo’y duha ka anak, base sa atong balaod, ang mga properties nga inyong napalit atol sa inyong panagpuyo makonsiderar nga gipanag-iya ninyong duha or co-owner mo sa maong kabtangan. Bisan pa kun pananglit ikaw wa’y actual contribution sa pagpalit sa maong mga properties, apan ang imong pag-atiman sa mga anak ug sa inyong panimalay, makonsiderar na nga imong contribution base sa Article 147 sa Family Code. Tungod kay co-owner ka man, aduna kay katungod nga mokuha sa imong share nga katunga kun ugaling adunay mahitabo sa imong kapuyo. Samtang kalabot sa katunga nga share sa imong kapuyo, ang inyong duha ka anak maoy magbahin niini isip mga compulsory heirs sa imong live-in partner. Busa dili makapanghilabot sa maong properties ang mga igsuon sa imong kapuyo. Hinaot nga akong natubag ang imong pangutana. Thanks and God Bless - Atty. Divine
Alang sa inyong pangutana may kalabutan sa problemang legal, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.