Tangkod nga usa ka semana ang nakalabay, nahitabo ang pagpamusil sulod sa convenience store sa Mandaue City.
Ang responsable mao ang security guard sa balay-patigayon kinsa mipuntareya sa tulo ka customer. Ang panghitabo nakuhaan og footage sa Closed Circuit Television (CCTV) camera hinungdan nga dili makalimod ang guwardiya sa krimen nga iyang gihimo.
Niadtong Martes, gipakita kanako ang video sa Mandaue City Police Office. Sus, pastilan, makapanglimbawot sa balhibo.
Nagkalalis ang guwardiya ug ang customer apan wala magdugay gi-one time niya pagsumbag ang lalaki hinungdan nga nahagba ug sa walay pagpanagana, iyang gipusil sa nawong.
Misulay pagtabang ang kauban nga customer, apan mao na usab ang iyang gipusil, maayo na lang nga wala makabuto ang armas ug nakaikyas ang customer.
Samtang ang laing customer nga natulog sa lamesa, naalimungawan sa hitabo ug mao na usab ang gitangkugo sa pagpusil sa guwardiya. Ang mga biktima anaa pa karon sa kritikal nga kondisyon sa tambalanan.
Katarungan sa sekyu nga gikataw-an sa mga customer ang iyang manager, ug hinungdan nga siya napanglimutan ug nahimo ang krimen. Apan base sa imbestigasyon sa kapolisan, dili tinuod ang alibi sa suspek.
Duha ang posible nga hinungdan, ang paggamit sa ilegal nga drugas o adunay deperensya sa pangisip ang sekyu. Unta giseguro sa security agency nga mentally fit ang tawo nga kuhaon nila alang sa puwesto.
Tan-awa karon naka-hire diay sila og guwardiya nga war freak nga walay pagduha-duha sa pagpamusil sa mga tawo nga dili niya magustohan.
Napasakaan na og kaso ang guwardiya ug napriso na, apan maayo nga iapil ang ahensya tungod sa ilang pagpabaya sa paghimbis sa mga tawo nga ibutang sa sensitibo nga trabaho.