Dear Atty. Divine,
May ipangutana unta ko bahin sa akong birth certificate. Ang nabutang man gud nga apelyido sa akong birth certificate sa NSO kay ang apelyido sa akong mama, apan ang akong gigamit hasta sa akong mga school records apelyido man sa akong papa. Natawo man gud ko sa wala pa makasal ang akong parents ug uwahi na sila nga nagpakasal. Gusto unta ko nga mokuha og Passport. Unsa may akong buhaton nga mausab ang akong apelyido sa mas dali nga proseso ug dili na moagi sa korte. Daghang salamat. — Jocel
Dear Jocel,
Kun way legal nga babag alang sa pagminyo ang imong mga ginikanan sa dihang ikaw gipakatawo ug dayon nagpakasal ang imong mga ginikanan human ka nahimugso, na legitimated na ang imong status apan dili kini automatic nga proseso. Kinahanglan nga imong adtuon ang Local Civil Registrar diin ka marehistro ug mangayo ka sa requirements alang sa legitimation ug imong i-submit kanila ang mga gikinahanglang dokumento aron mausab ang imong apelyido ug mabalhin sa apelyido sa imong papa. Usa sa mga requirements niini mao ang Marriage Certificate sa imong mga ginikanan ug uban pa nga dokumento. Imo lang hangyuon ang Civil Registrar nga ipa early endorse ang imong mga dokumento aron dali ka nga makakuha og kopya sa NSO nga corrected na ang imong apelyido. Dili na ka kinahanglan nga moagi pa sa korte sa maong proseso ug ang imong buhaton mao lang ang pag-comply sa tanang rekisitos ug i-submit sa Local Civil Registrar. Thanks and God Bless. – Atty Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.