Gisaway ug gibalikas og maayo si Presidente Benigno Aquino III tungod sa wala niya pagpirma sa balaudnon aron dugangan og P2,000 ang premium sa mga SSS pensioners sa nasud. Gihinganlan na lang og bisan unsa si Aquino sama sa wala kini kaluoy ug walay kasing-kasing alang sa mga retiradong mamumuo tungod kay wala niya pirmahi ang maong balaudnon.
Ang nahitabo kang Aquino dili iglayo sa nahitabo sa local levels. Adunay mayor o gobernador nga gipuntariya sa ilang mga kontra nga naglingkod sa konseho o hunta probinsyal ilabi na karong naghinangat na ang eleksyon. Maghimo-himo og mga ordinansahon nga sa unang tan-aw maayo apan kun tun-an og maayo dili diay makaayo sa mas kinabag-an.
Sama sa isyu sa SSS pension, wa makaabot og 3 milyones ka tawo ang mabulahan sa P2 mil nga dugang SSS premium nga gitinguha sa usa ka balaudnon. Apan kun tan-awon mas daghang kabus nga mga senior citizens ang walay SSS pensions nga matabangan pa sa P6 bilyones unta nga dugang premium sa pipila lamang.
Moabot og 30 milyones ang mga senior citizens nga way pension karon sa nasud sumala pa ni Aquino, dili ba diay sila angay kaluy-an?
Mas maayo pang ihatag na lang ang pundo sa PhilHealth aron kadtong walay pension, makagamit niini kun sila masakit aron bisan sa kataposang bahin sa ilang kinabuhi makaingon sila nga gitagad gihapon sila sa gobiyerno.
Kining mga nangambisyon og posisyon maayo gyud kaayong mohimo-himo og mga pangpalibog bisan sayop, wa mosubay sa proseso ug ang uban immoral pa gyud nga mga ordinansa o balaudnon.
Gamiton usab ug usahay magpagamit pud kining mga tawong matawag nga mao ray mabulahan sa ordinansa o balaudnon aron dauton ang ilang mayor, gobernador o bisan na ang presidente sa nasud alang sa ilang kaugalingong interes sa mga politiko.
Way mawala kun manguti-kuti ug magpangutana ang tawo bahin sa implikasyon, epekto, ug kaayohan sa ordinansahon o balaudnon, apan kinahanglang makiangayon kini sa mas kinabag-an subay sa Konstitusyon.