Nanghangyo sa pagsabot sa mga Sugbuanon ang mga tigpasiugda sa International Eucharistic Congress (IEC) tungod sa gikabalak-ang lapad nga kahasol sa trapiko sa pagtak-op sa kadalanan alang sa lokal ug langyaw’ng mga delegado gikan sa Enero 24 hangtod sa Enero 31.
Labing maapektahan ang kadalanan palibot sa IEC Pavilion sud sa San Carlos Seminary sa Dakbayan sa Sugbo, ang main venue sa kalibotanong kongreso. Apan may kalihokan sang mga delegado sa IEC sa ubang bahin sa tulo ka dakbayan sa Sugbo, Mandaue ug Lapu-Lapu.
* * *
Niang kalihokan nga labing makapausab sa trapiko: Sa Opening Mass sa IEC sa Plaza Independencia sa Dakbayan sa Sugbo karong Domingo, Enero 24, sugod sa alas-4 sa hapon, tak-opang kabahin sa M.J. Cuenco Avenue gikan sa M.C. Briones St. hangtod sa Legaspi Extension; kabahin sa Osmeña Blvd. gikan sa Lapu-Lapu St. hangtod sa M.J. Cuenco Avenue; kabahin sa M.C. Briones St. gikan sa Lapu-Lapu St. hangtod sa M.J. Cuenco Avenue; kabahin sa Legaspi Extension gikan sa M.J. Cuenco Avenue hangtod sa Arellano Blvd.; ug kabahin sa Serging Osmeña Blvd. gikan sa R. Palma St. hangtod sa Legaspi Extension. Did-an ang trucks, vans ug trailers pagsud sa SRP underpass sugod sa alas-2 sa hapon hangtod nga mahuman ang misa.
* * *
Sa kongreso sa Enero 22-25, tak-opang kabahin sa St. John Paul Avenue (kanhi Juan Luna Avenue) gikan sa TESDA hangtod sa Cardinal Rosales Avenue, sugod sa alas-5 hangtod sa alas-9 sa buntag ug sugod sa alas-2 sa hapon hangtod sa alas-7 sa gabii aron mas hapsay ug luwas ang pagsud-gawas sa mga delegado sa IEC Pavilion.
Tak-opan sa Misa sa IEC sa tugkaran sa Kapitolyo karong Enero 29, Biyernes, sugod sa alas-4 sa hapon ang kabahin sa Escario St. gikan sa F. Ramos Extension hangtod sa Gil Garcia St.; ug kabahin sa Osmeña Blvd. gikan sa Escario St. hangtod sa Jose Avila St. Human sa misa, tak-opan ang tibuok Osmeña Blvd. alang sa solemn procession gikan sa Kapitolyo paingon sa Plaza Independencia sugod sa alas-5:30 sa hapon.
* * *
Alang sa Misa ug Sinulog sa IEC sa Cebu City Sports Center karong Enero 30, Sabado, sugod sa alas-4 sa hapon, tak-opang kabahin sa Osmeña Blvd. gikan sa Sanciangko St. hangtod sa Arlington Pond St.; kabahin sa P. del Rosario St. gikan sa Pelaez St. hangtod sa Leon Kilat St.; ug kabahin sa R.R. Landon St. gikan sa Pelaez St. hangtod sa sports center.
Way tak-opan nga dan sa Statio Orbis, ang Santos nga Misa nga motak-op sa IEC, sa South Road Properties (SRP) sugod sa alas-4 sa hapon sa Enero 31 apan di pasudlong trucks, vans ug trailers sa South Coastal Road.