Kaniadtong adlaw’ng Huwebes, miulbo ang tensyon tali sa mga residente sa palibot sa Doña Pepang Cemetery ug mga sakop sa PROBE atol sa gipahigayon nga clearing operation sa mga pinuy-anan.
Niabot si kanhi mayor Tomas Osmeña nga daw susama sa usa ka bayani nga nagpakabana sa mga apektado nga residente.
Sa hilom nakaingon ko nga "wow duna g’yud diay kasing-kasing ang kanhi mayor alang sa mga kabus kay nagpakabana man sa ilang kahimtang."
Diha nga nilurang na ang kaguliyang, miduol ko sa kanhi mayor nga misulod na unta sa iyang sakyanan. Ako siya nga gihangyo nga mo-interview ko niya bisan og duha lang ka pangutana. Apan nakugang ug nikaging ko sa akong gibarugan diha nga arogante kini nga mitubag kanako nga nagkanayon "No, I don't want to be interviewed by GMA" dayon sibat.
Wala intawo’y nahimo ang pobre nga reporter gawas sa pagpaubos ug nagpasalamat gihapon sa pulong nga migawas sa baba ni Mr. Osmeña.
Nahibulong lang ko ngano nga ingon niadto ang reaksyon ni Mr. Osmeña kanako nga wala man ko makasala kaniya. Kun duna siya’y isyu sa GMA, dili ‘sab makiangayon nga idamay ang ordinary nga reporter nga igo lang naghimo sa trabaho.
Bisan ang uban moingon nga dili na importante ang tingog ni Mr. Osmeña kay wala na siya sa katungdanan o usa na lang siya ka "political has been" apan ako nagtuo nga bug-at ug mahinungdanon gihapon ang iyang mga pulong, ug tuod man ako g’yud hinuon ang nasugamak sa iyang insulto.
Bisan unsaon diay og tago sa tawo ang tinuod nga kinaiya mogawas g’yud ilabi na kun makalitan ug magtuo nga usa siya ka gamhanan nga mopagamay lang sa mga ordinary nga sibilyan.