Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Daghan na karon ang nakamatikod nga dili lang ang ilegal nga drugas ang mikuyanap sa nagkadaiyang dapit sa Sugbo kon dili lakip na usab ang ilegal nga sugal nga gitawag og suwertres.
Sa kampanya pagsumpo sa ilegal nga drugas, angay nato nga pagakpakan sa pagdayeg ang kapolisan kay daghan na man ang ilang nadakpan ug ubay-ubay na nga shabu ang ilang nasakmit.
Sa kadaghan na sa mga pushers nga nadakpan ug sa pinakete’ng shabu nga ilang nasakmit, apan sa gihapon ang maong suliran sa katilingban nagpabilin nga wala gayud masumpo.
Sa ilegal nga sugal sama sa ilegal suwertres, daw wala kaayo makalihok ang kapolisan kay wala man ikataho nga daghan na sa mga nalambigit niini ang nadakpan.
Hinuon dako og kalainan ang ilegal nga drugas kay ang tawo nga mogamit niini mausab man ang iyang panglihoklihok hangtud nga mosangko gayud sa pagkayabag sa iyang utok.
Samtang sa ilegal nga sugal, kadtong adunay kuwarta nga ikapalit og numero sa ilegal suwertres mao ra’y makaapil ug ang wala’y kuwarta dili man mapugos apan ang nakaparat kay naalkanse ang gobiyerno kay wala man sila magbayad og buhis.
Dugang kalailanan mao ang paggamit sa pipila ka estasyonan sa radyo sa pagpangilad pinaagi sa pagpanghatag og numero sa masiao nga ang mga announcer mangayo usab og kuwarta sa ilang mga tigpaminaw.
Mangayo ang mga hingtungdang magsisibya og kantidad bugti sa ihatag nila’ng numero nga kuno sigurado’ng mogawas.
Ang nahimo’ng biktima mao ang mga mag-uuma nga taga laing probinsya nga nakapaminaw sa maong sibya kay bation man sila og kaikag hangtud nga mamaligya intawon sila sa ilang kahayopan aron makabayad sa ihatag kanila nga numero, tagsa ra ba g’yud ang mogawas.
Kun adunay mga magsisibya nga manghatag og numero sa suwertres nga wala’y bayad, maisip lang kini nga pamasin sa motuo nga tigpaminaw lahi na kun manghatag nga bugtian og salapi isip bayad kay matataw man kini nga usa ka pagpangilad.