Diha kadto’y magsusulat nga nag-ingon nga ang labing maayo’ng paagi sa pagpamakak mao ang pagsulti sa matuod nga ipaagi sa usa ka bakak.
Kay ang usa ka tawo nga mangawat, natural nga dili siya motug-an nga siya ang nagkawat. Apan kun moingon siya nga siya ang nagkawat, ang sagad nga reaksiyon sa iyang ikasulti mao ang dili pagtuo kaniya. Sa padayong imbestigasyon sa Blue Ribbon Committee sa Senado sa pagtumaw sa daghang testigo nga nagtumbok sa tulo ka senador nga sila nalabigit sa P10 billion nga PDAF scam, kusganon lang gihapon sila nga nanghimakak og kalabotan sa maong anomaliya uban kang Janet Lim-Napoles.
Apan bisan pa’g mangulipas sila sa pasangil batok kanila, ang katawhang Pilipino kombinsido na, ilabi na ang pobre’ng mga magbubuhis.
Wala na sila’y kasibogan pa sa nagpangagot nga ngipon sa katawhan. Giliyokan na sila sa bangkaw nga sinimaan ug andam motudyok sa ilang kalag nga wa’y balatian.
Hinuon, inosente pa sila hangtud karon kay wala pa man mamatud-i nga sila sad-an.
Magkatawa pa sila karon, gani kana’ng interbiyohon sila sa mga reporter nga makita mo sa TV, mga hilaw kaayo’ng mokatawa kay sila mismo nasayod kun giunsa sila pagtulisok sa katawhang Pilipino tungod sa ilang pagpahimulos sa gahum.
“All power tends to corrupt, and absolute power corrupts absolutely.” Acton Lord.