Taranta sa sunog

Panahon na usab sa Fire Prevention Month. Nagkalainlain na usab nga kalihokan ang ipahigayon sa otoridad pagpahimangno sa publiko mahitungod sa angay nga mga buhaton aron paglikay sa insidente sa sunog. 

Apan ngano nga matag Marso lamang nato obserbahon ang Fire Prevention Month? Dili ba nga ang sunog walay gipili nga bulan o adlaw o oras?  Dili ba nga mobutho ang sunog sama sa usa ka kawatan?

Gikan sa Enero hangtud ning higayona, dili na maihap ang sunog nga miulbo sa Sugbo, ilabina sa Metro Cebu.  Gani adunay mga adlaw nga sunod-sunod ang pagkuyanap niini nga milamoy sa daghang kabtangan.

Ang Fire Prevention Month gitunong nga obserbahon matag Marso tungod lagi kay sa maong bulan magsugod ang ting-init. Ug tungod sa grabe usab nga kainit, dili usab kalikayan ang dakong risgo sa mga sunog.

Usa ka bulan ang kampanya sa otoridad pagpahimangno sa katawhan tibuok nasud mahitungod sa ka peligro sa sunog. Kalihokan sama sa mga fire drills, fire prevention seminars ug uban pa ang naandan na nga ipahigayon.

Bisan pa man niini, dili gayud malikayan ang pag-ulbo sa sunog. Matag tuig, milyones nga kantidad sa kabtangan ang gilamoy sa mga insidente sa sunog tibuok nasud. Gani pipila niining mga insidente ang mikalas og daghan nga kinabuhi. Wala man siguro nagkulang ang otoridad pagpahimangno sa publiko sa kanunay nga alerto batok sa sunog. Samtang kugi ang ilang kampanya, ambot kun nasulod ba usab kaha sa alimpatakan sa katawhan ang mga pahinumdom.

Murag anaa mismo sa mga molupyo ang problema. Kini gumikan kay dili nato ikalimod nga kadaghanan sa mga insidente sa sunog naggumikan sa kadanghag sa pipila bisan pa man niining mga pahimangno.

Tungod niini, angay lamang nga himuon ang kada adlaw nga pagpangandam. Dili lamang kita mataranta batok sa sunog matag obserbar na sa Fire Prevention Month. Dili gayud nato matagna ang panahon.

Mapugngan lamang ang mga insidente sa sunog kun alerto ug magtinabangay ang katawhan sa usa ka komunidad. Kini ilabina kun mosunod kita sa mga pahimangno sa otoridad.