CEBU, Philippines – Nalipay kita nga nagpuyo sa usa ka nasud nga gawasnon. Aduna ‘tay kagawasan sa pagsimba, kun unsay atong gusto, kagawasan sa kahadlok, ug sa pagsulti.
Apan sama sa usa ka gawasnong langgam, bisan gawasnon siya’ng molupad pataas, mobalik ra gihapon siya sa ubos.
Mao usab ang atong kagawasan kun atong pasubrahan kay manubag kita sa balaod sa Dios ug sa tawo. Kini usab makamugna og katalagman ug kagusbat sa atong moral nga maoy nahitabo karon.
Pananglitan ang mga tomboy ug bayot gusto’ng may kagawasan sama sa mga lalaki ug babaye kay lagi ilang katungod. Dinhi sa atong nasud dili pa hingpit ang ilang kagawasan kay wala pa itugot nga sila makasal sa pareho kanila.
Apan sa ubang nasud gitugotan na. Apan ang ilang mga kalihukan kun atong obserbahan gawasnon na. Wala nay pugong-pugong. Dili lang mga bayot ug tomboy, apil ang mga lalaki ug babaye nag-abuso sa ilang kalawasan. Dili ta kabadlong kay ang ilang rason ila man nga katungod. Mao nga napuno kita sa imoralidad.
Sa panahon ni Noe, ang yuta napuno sa imoralidad. Ang mga manulunda naghimo sa ilang kaugalingon nga mga dawo ug mipahimulos sa mga babaye. Unsay nahitabo, gilaglag sila’ng tanan pinaagi sa lunop. Ang matarong nga si Noe naluwas uban sa iyang pamilya.
Ang atong panahon karon ang pakighilawas abnormal na kaayo. Ang kagawasan giabusohan mao nga ang kalibutan napuno sa imoralidad. Lalaki sa lalaki, babaye sa babaye, mga pakighilawas, mga panapaw naghitak, lugos ang mga biktima apohan, inahan, anak mga bata bag-ong natawo ratsada.
Hasta mananap gitripingan. Pagkadautan na sa atong panahon. Hapit na kaha ang katapusan? Hinumdomi ang hinungdan sa kalaglagan sa mga adlaw ni Noe ug ni Lot.