Ang unang crossword puzzle napatik sa New York Sunday World niadtong December 21, 1913, kapin na sa usa ka gatus ka tuig ang milabay. Ug kini si Bernice Gordon sa Philadelphia, usa sa nag-unang tiggama sa crossword puzzle, giingon nga “she is as old as the crossword puzzle itself, “ kay karong bag-o nagsaulog sa iyang ika-100 ka tuig nga edad.
Pagpasidungog kaniya, gumikan sa pila na ka tuig niyang tampo sa New York Times ug sa Philadelphia Inquirer, gi-publish ang lain niyang tampo, “making her the first centenarian to have a grid printed in the newspaper.” Sa ato pa, sige pa siya’g gama og crossword puzzle, despite sa iyang edad. Matud niya: “They make my life. I couldn’t live without them.”
Sa ato pa, sigeng lihok ang iyang utok. Wala ma-stagnant, wala matay-i. Lisud baya ning paghimo’g crossword puzzle, mas lisud pa kay buot mo-solve niini.
Giingon nga samtang motiguwang ang atong lawas, ang utok dili. The mind will not grow old. Gawas kun dili na kini nato gamiton. Agup-opon ug malumotan na lang. Unya, ang utok daku man kaayo’g influence sa lawas … magluya sad ta kun maluya na ang utok.
Di kinahanglan nga maggama sad ta’g crossword puzzle. Ang pagbasa, usa sa makapaabtik sa utok. Continue reading. Palawiga ug palupara ang imong imagination.
* * *
Niay maayong balaudnon nga na-approve na sa Lower House, hinaut nga mahimo na kining balaud. Ang tanang ahensiya sa gobiyerno, gi-require pagmugna niining gitawag nga Government Service Entrepreneurship Development Program. Tuyo niini, mao ang pagbansay ug pagtudlo sa mga empleyado sa gobiyerno nga mamahimong malampuson sa pagpamatigayon tapus sa ilang pag-retire.
Sa ato pa, pangandam alang sa retirement … aron mapadayon ang pagka-productive sa mga opisyales ug mga empleyado sa gobiyerno sa ila unyang pag-retire, kini gawas sa pension nga madawat. Nindot ni programa, lagmit mahimo ra kini nga balaud.
Waa ni sa among panahon. Daghan kanato, walay igong kasinatian pagnegosyo. Maoy hinungdan, nga after retirement, maglibog kita mag-unsa, magsalimuang, labi na’g dili paigo ang pension nga madawat. Daghan kita’g kaila, lakip na ko ini, nagkagidlay gyud.
Ang main author niining maong balaudnon, si Rep. Susan Yap sa Tarlac, miingon nga: “The government must take part in preparing employees for better economic opportunities, and should prepare public officials and employees for an entrepreneurial life so they could continue being productive in a legitimate way once they leave public service.”
Tukma. Ug ayaw kalimot, paminaw kanunay sa Senior Citizens Hour sa DYRC 648 kHz matag Sabado, 5:00-6:00 pm. Tel. 4162868.