Mga cysts o bugon

Gatosan ka klase kining cyst o bugon nga motumaw sa ilawom o ibabaw sa bisan asa dapita sa atong lawas. Kanang bugon nga mahinol nato dapit sa ilokan, bugan o ilawom sa apapangig, ayaw pisilpisila kay mga kampo kana sa mga maayong bakteryang nagreskyu nga nakig-away madepensahan nga dili maimpeksyon ang apektadong dapit sama sa duol sa gikampohan nila.

Dunay bugon nga motubo sa ibabaw sa atong panit, sagad buhaton sa doctor niana, tusdikan nag dagom aron mohiyos kay may suyopon nga maoy nakaingon sa bugon. Usahay lugiton o operahan kini. Ipatan-aw gyud na’g doctor ayaw na bun-oga kay modako o modaghan kana. Hinuon sagad sa mga bugon benign o di kanseros apan naa say may kanser.

Sa bugon dapit sa liog (goiter), naay mougdo o naa say sa ilawom nagtubo. Naa say bugon sa ilawom sa suso. Basta makamatikod mong mora’g naay bugon nga nabatyagan, ayaw gyud kompiyansa nga mapasagdan kana.  Kay basig makanser na o mograbe na, malisod na hinuon nga matambalan.

Dunay bugon nga nagbutoy, dunay remedy ana sa balay mentras tanto nag-obserbar niini, may gitudlo nga angay buhaton: (1) Butangan og tea tree oil ang bugon. (2) Tapalan o butanga’g lanot sa aloe-vera. Ayaw gyud kawta kay mokatol ni basi’g mamula o maimpekted. (3)Palig-ona ang lawas o ang imyunsistima mo. Tumar o inom og natural food supplement, sama pananglitan sa ‘Spirulina’ kay immune booster kini. (4) Limpyohan kanunay. May mga bugon usahay mawala lang. Way sakit mabati o hilantan ka’g balikbalik o mora la’g wala. Pero mas maayo, iseguro gayud kana nga ipatsek-up sa doctor aron mahibaw-an dayon, kun ngano o unsa gyud na.