Bulan sa kabataan

Gisaulog ning buwan sa Oktubre ang National Children’s Month diin ang DSWD (Department of Social Welfare and Development) maoy nangulo.

Ang mga importante nga panginahanglanon sa  kabataan maoy gihatagan og seryosong pokus sa kagamhanan.

* * *

Ang katungod sa kabataan, lakip na ang ilang panglawas ug kaugmaon, mao say gihatagan og atensiyon. Kining maong kasaulogan sa Buwan sa Kabataan mihatag kini og kahigayunan kanato sa pagpakita sa atong concern kon kahingawa sa mga problema sa atong kabatan-onan.

* * *

Daghang paagi nga makatampo kita sa pagkab-ot sa maayong sangputanan niining kasaulogan sa National Children’s Month. Sama pananglitan sa pagtabang sa kabataan sa kalye sa ilang pagkaon, pagpamiste, ug paghatag kanila og atop sa ilang ulo.

Daghan pa sa atong mga libud suroy nga kabataan ang nagumon sa ginadiling drugas tungod kay wala man kahatagi og igong giya aron sila mahilikay sa maong bisyo.

* * *

Dinhi sa ato matag Oktubre ra ang selebrasyon sa adlaw sa kabataan. Suma pa sa Children’s Welfare Journal nga gipatik quarterly sa The Hague, naay mga nasud diin ang kasaulogan himoon kada adlaw sama sa India, Germany, Japan ug Norway.

Mas maayo man gyud unta ang subsub nga selebrasyon kay walay putol ang programa nga gisugdan na.

Apan matud pa sa usa ka opisyal sa atong kagamhanan gastoso ang maong paagi. Busa gihimo lang nga binuwan ang kasaulogan basta kuno “sustained” lang ang pag-implementar sa programa.

* * *

SA LAING BAHIN ... Mangumusta kita sa atong mga higalang magbabasa ning Banat News diha sa Banawa-Talamban area ug sa Brgy. Guadalupe.

SK elections  init kaayo

Ni Rene U. Borromeo

Masinati ang init g’yud kaayo nga kampanya pagpili og mga chairman sa Sanguniang Kabataan (SK) dinhi sa dakbayan sa Sugbo atol sa ipahigayon nga SK Elections unya sa Pebrero 21.

Ang grupo sa Bando Osmeña Pundok-Kauswagan (BOPK) nga gipangulohan ni kanhi kongresista Tomas R. Osmeña ug ang Team Rama nga ubos ni Mayor Michael Rama sigurado nga maninguha nga ilang alyado ang labing daghan nga makadaog. Kun kinsa sa duha ka grupo ang labing daghan og alyado sa mga chairmen sa SK maoy posible nga makabutang og SK representative diha sa konseho sa dakbayan.

Ang lagda mao nga ang mga modaog nga chairmen sa SK sa 80 ka barangay sa dakbayan sa Sugbo magpili og ilang presidente. Aw natural, kun kinsa kadto’ng mga alyado sa Team Rama, ang pilion nila mao g’yud ang ituboy sa ilang grupo.

Ingon usab niini ang sitwasyon sa BOPK. Ang mga SK chairmen nga alyado sa BOPK mopili gayud sa kandidato nga ituboy sa ilang pundok. Hilas-hilas na man lang gud kun moingon ta nga non-partisan ang SK elections.

Ang pag-ingon nga non-partisan ang barangay ug SK elections naa ra kana sa papel apan sa aktwal dili kana maoy nahitabo.

* * *

Sigurado nga maninguha gayud karon ang Team Rama nga sila ang makapabutang og ex-officio member diha sa Cebu City Council nga gikan sa sektor sa kabatan-onan. Samtang ang BOPK maninguha gayud ‘sab nga ila ang SK federation president aron mosamot nga lig-on sila diha sa konseho. Pagka karon, sa 17 ka konsehal nga sakop sa Cebu City Council, siyam ang alyado sa BOPK ug walo ra sa Team Rama.

Kun ang Team Rama maoy makabutang og ex-officio member nga gikan sa SK, magpasabot nga siyam na ang ilang alyado sa konseho. Kun mahitabo nga adunay pagahimoon nga botasyon sa mga isyu nga lantugian, mahimo nga mapilde ang BOPK kay samtang patas na sila og gidaghanon apan ang presiding officer mosalmot na sa pagbotar aron pag-break sa tabla.

Unya kay si Vice Mayor Edgardo Labella sakop man sa Team Rama, ayaw ko’g ingna nga adto siya mosuporta sa BOPK. Dili ba vice mayor? Ngisi ra ba dayon ni si higala’ng Vice Mayor Labella.

Apan nakadungog ko nga adunay gihulagway nga “dark horse” sa mga konsehal nga alyado sa Team Rama. Kini’ng mao nga konsehal, dili g’yud kuno ni siya hugot sa bakus nga molaban sa grupo kun matan-aw niya nga dili maayo.

Kinsa ni siya? Kaila mo?