Dear Atty. Divine,
Duna mi agricultural land nga sinunod sa among amahan. Nakapangan kini nako ug sa akong igsuon. Niadtong 2005 among gibaligya sa akong uyoan ang portion sa maong property ug niadtong 2013 ang remaining portion gibaligya na sab namo sa among uyoan. Karong bag-o nakadawat mi og notice nga nag-awhag kanamo sa pagbayad sa real property taxes sa maong yuta. Sa diha’ng akong gisusi wa pa diay kini mabalhin sa pangan sa among uyoan lakip na sa Register of Deeds. Ang akong pangutana mahimo pa ba namo nga angkonon pagbalik ang maong property ug ibaligya sa lain? Mahimo ba’ng mapugngan ang akong uyoan sa pag-transfer sa maong property? Unsay maayo namo nga buhaton? -Dencio
Dear Dencio,
Kun inyo nang nabaligya ang kinatibuk-ang property ngadto sa imong uyoan ug nabayran mo sa inyong gikasabotan nga presyo, then na perfected na ang inyong kontrata sa pagbaligya ug way rason nga inyo kining kuhaon pagbalik sa inyong uyoan. Kun inyo kining ibaligya pag-usab tungod kay sa inyong pagsusi wa pa kini mabalhin sa pangan sa inyong uyoan hayan mahimo kamong ikiha sa imong tiyo nga maoy una’ng nakapalit lakip na sa ikaduha’ng buyer kay maisip man kini nga pangilad kay kaduha man ninyo gibaligya ang inyong property. Kadtong Deed of Absolute Sale nga una ninyo’ng gipirmahan mao kadto ang magamit nga ebidensya sa imong tiyo nga iya nang napalit ang maong yuta gikan kaninyo. Kun wa pa ma-transfer ang ngalan sa titulo sa yuta posible nga nangita pa og kwarta ang imong uyuan aron ibayad sa buhis sa BIR alang sa pag-transfer sa maong property. Ang maayo ninyong buhaton karon mao ang pagpahibawo sa inyong tiyo nga aduna nay notisya alang sa buhis sa property nga iyang napalit aron ilang mabayran ang buhis niini. – Atty. Divine