Ang One Meralco Foundation (OMF) miinstalar og solar photovoltaic system sa Cabul-an National High School sa isla sa Cabul-an sa Luzon ug kini napahimuslan og dako sa mga magtutudlo ug sa mga estudyante.
Ang mga magtutudlo, ingon man mga estudyante, adto na magpa-charge sa ilang mga cellphones, mga laptop ug computer, nga sulod sa nanglabay’ng katuigan, ila kining suliran.
Ingon man, wala na sila maproblema pagtudlo sa Information Communications Technology, kon ICT.
Matud dinhi, “The clean, free and renewable electricity available in school has also become an added incentive to students to go to, and stay, in school since it is a place where they can also charge their cellphones while pursuing their education.”
Ang walo ka classroom nga tunghaan, anaa magtungha ang mga estudyante gikan sa duha ka barangay sa isla, ang East Cabul-an ug West Cabul-an.
Gihimo nga negosyo sa Parent-Teacher Association (PTA) diin magpabayad sila sa pagpa-charge sa cellphones ug ubang mga gadgets, ang kita gamiton pag-maintain sa system ug ubang gastohan sa tunghaan. Mahimo ba kaha ni dinhi sa ato sa mga hilit ug kabukirang barangay nga dili maabot sa elektrisidad? Duna bay foundation ang VECO, o negosyo ra g’yud nang ila?
* * *
Sa Manila, ilang gipanghingusgan ug gitinuod ang paglimpyo sa mga esteros. Kahibawo man ta, nga hugaw kaayo ang mga estero, puno sa basura, ug nakatampo kaayo’g dako sa lunop, tungod sa pagkabara sa mga agianan sa tubig.
Sa ato na’ng gibalikbalik dinhi, ang flooding dako na kaayo kini nga suliran sa tibuok nasud, ug lisud nang sulbaron tungod kay ang kinaiyahan na mismo maoy atong kontra gumikan sa ilang pagpanimalos sa kadako sa kadaut nga atong gipahamtang ngadto kanila.
Ato sila’ng gikastigo og maayo, gisilotan, ambot unsay ilang sala, busa, nanimawos na sila. Dinhi sa ato, atong makita nga ang mga esteros hugaw ‘sab kaayo, atong gipagamyan ug sa ubang mga dapit, atong gitukoran og kabalayan ang ibabaw niini.
Mahimo nga ato ‘sab ning buhaton dinhi – ang pagpanglimpyo sa atong mga esteros. Atong tinud-on, bisan kun dunay maapektahan nga mga botante ug mga magbubuhis.
Mahimo nga mo-coordinate sa DPWH, bisan kun ang matadlasan sa mga estero iya sa dakbayan, ug dili property sa national government.
Suliran kini nga dili masulbad sa gobiyerno lamang, kundili, gikinahanglan ang bulig nato’ng tanan, after all, kita man, lungsod maoy nakaingon niining tanan. Di ba?