Adunay mga pangutana kon kining mga lump sum appropriation sa mga local government units, dili ba maisip nga pork barrel, susama sa PDAP?
Sa atong nasayran, karong bag-o, sa Quezon City, usa ka magpapatigayon, usa ka columnist sa nasudnong mantalaan, ug usa ka community leader, mi-petition sa Korte Suprema “seeking to void the continuing practice of alleged ‘pork barrel system’ in local government units similar to the Priority Development Assistance Fund {PDAP} of lawmakers that was declared unconstitutional.”
Bitaw no, kining pagpang-aprobar og mga lump-sum appropriation ug mga discretionary funds ngadto sa mga local government units, dili ba tuod ni maisip nga LGU version sa pork barrel?
Gitudlo ang gihimo sa Quezon City diin ang city council migahin og kapin sa 4 bilyones pesos nga lump sum ug discretionary funds alang sa buhatan sa mayor sa tuig 2013 ug 2014. Giingon dinhi nga ang maong practice, paghatag og blanket authority sa mayor o gobernador kon unsaon paggasto ang maong salapi, “without any itemized public purposes or details runs counter to the Local Government Code.”
Huwaton nato kon unsay ruling niini sa Supreme Court.
* * *
Hangtod sa atong pagsulat niini, wa pa g’yuy klaro kon unsay dangatan sa Freedom of Information (FOI) Bill. Ang tanan pulos lang mga pasalig nga ila na kining hatagan og pagtagad.
Hinumdoman nato nga usa kini sa campaign promises ni Noynoy nga aron ma-fully transparent ang iyang pangagamhanan, iyang himuong balaud ang FOI.
Sa mga nasud nga misagop sa Freedom of Information, dako kaayo ang pagkibra sa incidence of corruption. Kon tininuod pa ang pagsubay sa daang matuwid, kon kinasingkasing pa ang pagsanta ug pagpuo sa corruption, ang una untang agenda ni Noynoy dihang miasumir siya sa katungdanan mao ang pagpaninguha nga mapalusot ang FOI bill.
Ingon man, matingala usab kita ngano nga ang Kongreso mismo mora man ‘sab og walay gana nga mahimong balaud ang FOI. Duna ba silay mga tinagoan nga mahadlok sila nga masayran sa lungsod? O dili sila gusto nga mapuo ang pangurakot ug lipatlipat sa gobiyerno?