Padayong gikagubtan sa Talisay City ang pagkabakante sa puwesto sa presidente sa Talisay City College (TCC) nga nagpasabot nga abagahon kini sa pagdumala ni Mayor JVR.
Napul-an ang mga estudyante sa TCC sa nasinati nila nga kaguliyang sa administrasyon sa maong kolehiyo diha nga nag-ilis-ilis ang gitudlo’ng presidente niini.
Kay kon nagpadayon pa ang maong sitwasyon, tataw kaayo nga wala’y kahapsay ang huna-huna sa mga estudyante.
Wala usab sila’y tino nga kadangpan kon may suliran sila nga angay ipadangat ngadto sa labing taas nga pamunoan sa maong eskuylahan, tungod kay wala’y klaro kinsay tinuod nga presidente niini.
Karon mibiya na usab si Engr. Gamaliel Vicente Jr., nga mao untay nauyonan sa TCC Board of Trustees nga modumala sa TCC isip presidente.
Ang mga miyembro sa TCC Board ug si Mayor JVR mora’g wala magkasinabot, kay kon may itudlo nga presidente ang mayor, dili uyonan sa board, ug kon may itudlo ang board, dili usab uyonan sa mayor.
Nasabtan sa Espada nga wala’y koordinasyon ang mayor ug ang mga sakop sa TCC Board nga ang tanan musangpot sa dili maayong pagdumala sa TCC.
Kanus-a pa diay kaha magkasabot ug magkauyon ang TCC Board ug si Mayor JVR alang sa itudlong presidente sa TCC?
Kon dili sila magkasinabot magpabilin nga adunay vacuum ang TCC.
* * *