Dear Atty. Divine,
Duna ko’y gipalit nga yuta nga hulogan kon installment sulod sa lima ka tuig. Duha na lang unta ka tuig ang akong kuwang aron mahuman ang pagbayad niini apan karon naglisod ko pagbayad sa binuwan sa maong yuta human masakit ang akong anak ug gi-operahan. Tulo ka buwan na nga wala ko makabayad ug plano unta nako nga dili na lang mopadayon pagpalit sa maong property kay dili na nako makaya. Ang akong pangutana attorney kun mabawi pa ba nako ang akong gibayad sa maong yuta sulod sa tulo ka tuig kun dili ko mopadayon sa pagpalit niini? Salamat daan sa imong pagtagad. – Tonya
Dear Tonya,
Kun pananglit ma-cancel ang imong pagpalit sa maong property tungod sa kapakyas nimo pagbayad sa binuwan nga obligasyon, mamahimo nimo nga makuha pagbalik ang imong gibayad apan dili ang kinatibuk-an niini. Base sa Republic Act 6552 kon Realty Installment Buyer Act nga ang buyer sa real estate entitled sa dili mominos katunga nga refund sa iyang gibayad nga installment kun siya nakabayad na sa maong property sulod sa duha ka tuig. Apan walay labot niining maong balaod kun ang yuta nga imong gipalit industrial lots, commercial buildings ug kining pagbaligya sa pwesto sa commercial area ngadto sa mga tenants (Sec. 3, RA 6552). Sa ato pa, kay tulo ka tuig ka na man nga nagbayad sa maong property then mamahimo nimo nga makuha ang katunga sa imong gibayad sa tag-iya kun ugaling ma-cancel ang inyong Contract to Sell nga gipirmahan. Hinaut nga akong natubag ang imong pangutana. Thanks and God Bless. -Atty. Divine
Alang sa inyong pangutana may kalabutan sa problemang legal, ipadala lang sa Legal Corner sa Banat News sa V. Gullas Street, Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules ug Domingo.