Kanus-a pa kaha kita makapili og presidente sa nasud nga wala na’y manaway sa iyang pamaagi pagdumala sa atong kagamhanan?
Ang pangutana kun moabot kaha kini’ng mao nga sitwasyon? Kun kini’ng mga sabaan kaayo nga lider sa lainlaing grupo nga kusog kaayo’ng panaway ni bisan kinsa nga magdumala sa atong kagamhanan maoy atong palingkoron diha sa Malacañang, wala na kaha’y manaway kanila?
Pipila ka mga tawo nga kaniadto pwerte kasabaan ug maoy mangulo sa pagpahigayon og protesta nga kalihukan diha sa kadalanan apan diha nga sila gipalingkod na og pwesto sa kagamhanan, wala man lagi makasulbad sa problema?
Katuohan ang pagduda sa uban nga adunay mga pundok nga kusog lang gayud mopasiugda og protesta nga kalihukan batok sa kagamhanan kay aduna may mga nagsuporta kanila ug naghatagan og dagko’ng kantidad nga salapi gikan sa langyaw nga mga nasud.
Apan tukma nga magpakabana ang katawhan kun aduna sila’y makita nga kahiwian sa mga nagdumala sa atong kagamhanan. Mahibulong lang hinuon kita kay tanan nga mahimo’ng presidente sa nasud sawayon man g’yud sa mga walhon nga grupo.
Kadto’ng mga tawo nga sabaan kaayo ug kusog manaway sa mga nagdumala sa kagamhanan kaniadto pipila kanila gitugyanan paglimpyo sa kurapsyon diha sa ahensya diin sila gidistino, apan sila pakyas ug walay nahimo.
Niini’ng bahina anam-anam ang katawhan nga nagtuo nga kini’ng mga tawo nga kusog kaayo nga manaway sa mga opisyal sa kagamhanan utro pa diay nga walay paagi pagsulbad sa suliran nga buot nila papason.