Hangtod karon wa pa mosalikway ang Vatican sa kahigayonan nga mohapit si Pope Francis pagduaw sa mga biktima sa bagyong Yolanda sa Kabisay-an human sa iyang upat ka adlaw nga pagtambong sa mahinungdanong kalihokan sa South Korea. Sa samang higayon wa pa sab motino ang buhatan sa Santo Papa makahigayon ba siya pagsusi sa mga dapit nga labing naggusbat sa usa sa labing bangis nga katalagman sa atong panahon.
Maong way laing mahimo ang Catholic Bishops Conference of the Philippines (CBCP) gawas sa hingpit nga pagpangandam sa kahigayonan nga moduaw gyong Santo Papa. Bisan sa pakiluoy sa kadagkoan sa Simbahang Katoliko sa Leyte ug Samar nga di pa sila andam.
* * *
Si Cebu Archbishop Jose Palma, kanhi presidente sa CBCP, niingon nga ang labi nilang gipangandaman mao ang International Eucharistic Congress (IEC) nga gitakda sa Vatican nga himuon og mas sayo kay sa orihinal nga schedule. Usa sa mga hinungdan nga nabalaka ang kaparian nga mahinayon ang paghapit ni Pope Francis karong Agosto mao nga maibanan ang kahigayonan nga makatambong siya sa mas mahinungdanon nga IEC karong Enero 16.
Apan ang pagpabalhin sa petsa sa IEC aron matakdo sa kalendaryo sa Santo Papa ug ang makanunayon nga pakisusi sa Vatican sa pangandam sa kalibotanong kalihokan maoy labing lig-on nga mga timaan nga motambong si Pope Francis.
* * *
Si Pope Francis ang moduma sa Asian Youth Day ug sa beatification sa 124 ka Koreano nga nagpakamatay alang sa Simbahang Katoliko karong Agosto 14-18, 2014. Kun tumanon ang gisubli-subli niyang pangandoy sa pagpakighimamat sa mga biktima sa katalagman sa Kabisay-an, kinahanglang usbon ang puno niyang kalendaryo. Nga magkahulogan sa pagkanselar sa ubang natakda nang daan niyang kalihokan sa ubang bahin sa kalibotan.
Bisan maapiki ang kadagkoan sa simbahan sa pagpangandam sa iyang pagduaw, may sukaranan ang mga biktima ni Yolanda nga mangaliya nga makalili sa pait nilang kahimtang ang kalibotanong pangu sa simbahan. Kay ang iyang presensiya maoy motino nga di sila makalimtan.
* * *
Ang pait nga kamatuoran mao nga samtang wa pa mobiya sa nagkalainlaing kahugpongan sa pagtabang sa mga biktima ni Yolanda sa amihanang Sugbo ug silangang Kabisay-an, hagbay rang nawaling ang atensiyon sa kasagaran sa kanasuran ngadto sa mga biktima sa bag-ong mga katalagman. Kun mahinayon ang pagduaw ni Pope Francis sa Kabisay-an karong Agosto, kuyogan siya sa kalibotanong media. Nga motutok sa ilang kamera sa nagpabiling pait nga kahimtang sa mga biktima siyam ka buwan human ni Yolanda. Bisan ang pamunoan ni Presidente Noynoy Aquino di mahitabong molugak sa pagpatuman sa ambisyuso nilang rehabilitation plan. Di sila morisgo sa kahigayonan nga ang makita sa tibuok kalibotan mao ang masulub-on nga hulagway sa pagpabaya.
* * *