Karong Abril 27, 2014 saulogon ang ika 493 ka kasumaran sa kadaugan sa Mactan. Niining petsaha gipukan ni Lapu-Lapu ang manunulong nga si Magellan. Unsa man gayod ang hinungdan sa kapildihan ni Magellan batok ni Lapu-Lapu? Una kompiyansa ug sobrang pagsalig sa kaugalingon. Nganong ika-ingon man niini? Tungod kay niining petsaha atol kadto og adlaw’ng Sabado ug para kang Magellan ang Sabado adlaw sa kadaugan, tungod kay adlaw’ng Sabado kadtong iyang gipukan ang Morocco sa dihang ila kining gisulong. Gawas pa niana gibalibaran ni Magellan ang tanyag ni Haring Homabon nga pakuyugan sila og saysenta ka mga maisog nga mga lalaking Sugbuanon, sa dayon na nilang sulong sa Mactan. Kay para kaniya sayon rang buntogon ang Mactan.
Ika-duhang rason sa kapildihan ni Magellan mao ang ilang nahiagoman nga mga tunok sa hunasan, samtang sila nagpadulong sa baybayon sa Mactan.
Kun atong matikdan ang bulan sa Abril dako nang hunas sa gabii ug dako nang dagat sa adlaw. Sa kaadlawon nga misulong sila sa Mactan wa gyud sila makadunggo sa baybayon. Ilang gipundohan ang ilang sakyanan diha sa luwas ug napugos pag-ubog sa hunasan.
Tungod kay ang hunasan daghan man og tuyom ug dap-ag, aw siyempre nahiagom sila sa mga tunok niini. Pag-abot nila sa baybayon tuy-an na sila sa mga tunok ug gibati nila ang kaluya. Mao nga sa dihang nahitabo ang panagsangka igo ra silang gitiwasan ni Lapu-Lapu ug mga kauban niini. Nagmadaugon ang Mactan.
Mao nga sa matag Abril 27, gisaulog ang kadaugan sa Mactan.