Dunay usa ka nurse sa dihang dunay gipahigayon nga relief operations sa Super Typhoon Yolanda dinhi sa among parokya ang niingon kanako: "Padre, nagdamgo lagi ko sa Mahal nga Birhen Maria, nagpasabot ba ni nga magdebosyon ko niya?" Ako siyang gitubag ning mosunod:
1. Nindot ang magdebosyon sa Mahal nga Birhen Maria.
2. Sa laing bahin, ang maong damgo ang nipakita sa iyang unfinished business sa iyang mama.
Wala lang tuyoa nitubod ang iyang mga luha. Iyang gisugid kanako nga wala siya sa katapusang gutlo sa iyang inahan kay lagi nakalakaw siya gawas sa nasud. Gitawgan siya sa iyang mga igsuon apan nagmakuli siya sa pagpauli. Ang maong guilt-feeling iya gihapong gidala-dala. Ang Mahal nga Birhen Maria simbolo sa pagka-Inahan nga nahimong isyu alang kaniya. Kun ang nagdamgo sa usa ka inahan mao mismo ang inahan, nan, mahimo nga sabton nato kini nga adunay panagsungi ang actual self batok sa ideal self sa usa ka inahan. Ang si bisan kinsang inahan nga magdamgo niini ang kinahanglanong mamalandong kun sa unsang paagi niya gidala ang iyang pagka-inahan ug kuyog niini ang pag-angkon sa iyang mga kahadlok ingon man mga kabalaka.