Naghilak ang iyaan nga misugid sa gidangatan sa iyang pag-umangkon, kinsa kanhi usa ka scholar ug buotang bata, apan dili maka-graduwar ning tuiga kay naulipon sa ginadiling drugas. Didto kini magsugod dihang gipaapil ang estudyante sa politika sa Sangguniang Kabataan.
Dato ang ilang kaliwat. Buhong sa pagkaon ug salapi. Ug matud pa sa iyaan, kada-session kuno sa SK, diin sagad sa mi-entra sa grupo mga anak og sapian, dili diay meeting alang sa kaayohan ang ilang saw-an; kun dili, hingos sa shabu maoy ilang gikalingawan. Dinhi makat-on ang maong estudyante sa paggamit sa naasoy’ng deadly nga drugas. Iyang utok nakutaw. Iyang kabuotan nahanaw. Gipulihan sa kinaiyang mapintas.
Ang ginikanan sa maong adik napobre intawon. Ilang kuwarta hurot. Ilang kabtangan nagkaanam na’g kahilis kay gipamaligya’g barato sa ilang anak adis-adis, kinsa manghagis kun wala dayo’y ikapalit og shabu. Lakip na ang iyaan nga misugid niining estoryaha, gikawatan sab sa maong adik. Hinungdan, nga nakahukom sila nga ila na lang kining ipasulod sa rehabilitation center uban sa paglaum nga mareporma pa ang utok nga giguba pag-ayo sa shabu. Gianugnan ang iyaan sa gidangatan sa maong batan-ong pag-umangkon. Kay imbes entablado sa eskuylahan ang tungtongan niini ning umaabot nga graduation day sa Marso, adto na man hinuon kini puyo sa rehabilitation center sa mga adis-adis.
Mga ginikanan niini, grabeng mahay sa SK. Kay dinhi kuno magsugod nga nakat-on ang ilang anak sa pagsuyop og shabu hangtod nga naturiring. Buanga, no? SK, sinugdanan sa drugas? Maay’ra gyud diay nga gitangtang ni sa miaging piniliay?