Unsa kaha’y nasulod sa utok niining usa ka kawani sa Cebu City Hall nga atul sa oras nga tingtrabaho nag-inum na man og beer ug nag-videoke sa kan-anan likud sa Gaisano Main kaniadtong Huwebes sa hapon?
Wala pa g’yud kini mauwaw nga nagsul-ob pa og uniporme nga green ug may logo pa sa City Hall ang maong T-shirt. Nakahuna-huna ko nga ako unta nga badlongon apan nausab ang akong hukom.
Ako na lang gipasagdan ang maong upaw nga kawani apan gikuhaan nako og video samtang nagkanta ug nagtungab og beer. Gipatan-aw nako si Mayor Michael Rama ug iyang gimando nga ipasusi kini ni Atty. Dominic Diño.
Husto si Mayor Rama nga dali ra kini mailhan ang maong kawani. Aw, kadtong mga department heads nga adunay mga kawani nga upaw pangutan-a kun dili ba sila ang akong gipasabot.
Wala lang siya makaila kanako nga taga media ug nadistino sa City Hall. Giteksan nako si Mayor Rama ug City Administrator Jose Marie Poblete apan wala dayon makaresponde.
Kun nakaadto pa ang mayor ug ang city administrator masakpan g’yud unta ang maong kawani sa akto nga pag-videoke ug pag-inum og beer atul sa oras nga tingtrabaho.
Mibiya ang maong kawani gikan sa videokehan mga hapit na ang alas kwatro ug misulod sa Gaisano Main. Alang kanako dili gayud maayo ang iyang gihimo kay oras pa sa tingtrabaho.
Siyaro na man ‘sab og dili na lang g’yud siya makapaabot sa alas singko sa hapon ug busgon niya pag-ayo ang iyang tiyan sa pag-inum og beer unya hutdon ang iyang tingog sa pagkinanta.
* * *
Pastilan, pagkabati ‘sab sa report, kun tinuod man, nga ang mga sakop sa Philippine Drug Enforcement Agency (PDEA) misulod og balay nga kuno nagtipig og shabu unya walay search warrant.
Unya, dihang gipangutana sa mga reporters ang mga opisyal sa PDEA sila miingon nga surveillance kuno kadto. Naa ba’y surveillance nga mosulod og balay?
Tell that to the dead marines. Bisan og dili ko polis apan kay nahimo ko nga police/military reporter sa mohapit 11 ka tuig, dili ko mailad kun surveillance na ang pagahisgutan.
Dili panghambog kahibalo ako kun unsaon ang pagpahigayon og surveillance nga maglakaw ug bisan surveillance nga magsakay og sakyanan. Labaw na nga kahibalo ko unsaon nga makaikyas ko sa mga nag-surveillance nako.
Kamo sa PDEA, pagtarong mo uy. Unya, unsa man kadtong report nga ang usa ka opisyal nanghagit og pinusilay sa reporter? Pagkabati g’yud kon kini tinuod.