Maglabad gyud ang ulo ni kanhi Konsehal Joey Daluz ug Ester Concha ning sunodsunod nga kasong ilang atubangon human sila mag-apil-apil sa barangay election sa barangay Calamba niadtong Oktubre 28.
Nag-atubang karon og imbestigasyon sa Ombudsman alang sa kasong kriminal ug administratiba si Daluz human misang-at og reklamo ang 20 ka mga lumolupyo sa barangay Calamba ngadto kang Deputy Ombudsman for the Visayas Pelagio Apostol.
Kining mga kasoha magsumikad sa insidente sa precinct numbers 1315B, 1336B ug 879 sa Bliss Elementary School diin nasakpan sila nga misulod samtang nagpahigayon sa eskutinyo ang mga board of election inspectors (BEI) sa mga balota.
Silang Daluz ug Concha pulos mga opisyal sa Cebu City Hall. Si Daluz maoy executive assistant sa Barangay Affairs on Infrastructure ug maoy vice chairman sa Local School Board sa kagamhanan sa siyudad sa Sugbo.
Unsa may problema kun mga opisyal silang Daluz ug Concha, dili diay mahimong manulod sa polling precints?
Silang duha pulos mga government officials. Mismong silang duha nasayod nga kun mag-apil-apil sila sa kalihukan sa eleksiyon, ang ilang gihimo “electioneering†nga dakong kalapasan sa balaod.
Mao kini hinungdan nga gireklamo silang duha tungod sa matud pa paglapas nila sa Code of Conduct and Ethical Standards for Public Officials and Employees ug sa kalapasan sa Omnibus Election Code.
Ako’y gikuyawan aning gihimo nilang Daluz ug Concha. Kining kalihukan sa barangay, apil na ang eleksiyon, usa ka non-political, busa walay opisyal sa gobyerno o politiko nga gitugotan nga mag-apil-apil ug kun molapas manubag kini sa kasong “electioneering.â€
Usa man ka abogado si Daluz ug nasayod siyang mahimo siyang makasohan og disbarment nianang iyang gihimo.
Gani, adunay nakasulti kanato nga daghang mga residente sa Calamba nga nakakuha og video sa cellphone nga si Daluz ug Concha mitambong og pulong-pulong sa mga kandidato sa Calamba ug mogunit gyud og mikropono aron mamulong.
Kining pagpanghilabot nilang Daluz sa eleksiyon sa Calamba migawas kini sa balita sa ABS-CBN ug duna gyud kini footage.
Gitugot ba kaha ni Mayor Mike Rama ang gihimo ni Daluz?