SM City Cebu Northwing—Gihangop sa mga Sugbuanon ang kahigayonan nga makatabang pagpanalipod sa kalikopan pinaagi sa pagdagan. Tulo ka libo ang nisalmot sa Kapamilya Run sa Sugbo nga kabahin sa One Run One Philippines nga dungan nga gihimo sa Quezon City, Bacolod City, Davao City ug Los Angeles sa California sa Estados Unidos.
Itabang pagpalambo sa naggusbat nga fish sanctuary sa Daan Paz sa Poro, Camotes, sa amihanang Sugbo ang natigom sa lumba sa dagan nga nanukad ug natapos dinhi. Gigantihan ang pagsakripisyo pagpangadlawon pagdagan sa mga Sugbuanon sa kasayuran nga dako ang ilang tampo sa pagbanhaw sa bakhawan ug pagpalambo sa panginabuhi sa mga molupyo sa isla.
* * *
Silang Mayor Luciano Rama sa Poro ug Barangay Kapitan Rene Gubalane sa Daan Paz nangadlawon sab pagtabok sa bangis nga kadagatan sa Camotes aron pagpangunay pagpasalamat sa tanang runners. Apan tungod sa kadagko sa bawod nalangay ang ilang barko pagdunggo sa Dakbayan sa Danao ug wa na silang kaabot sa pagpasidungog sa mga mananaog sa Kapamilya Run.
Ipahigayon sa kabaybayonan sa Daan Paz ang pormal nga pagtunol sa hinabang. Nga mahitabo kun matigom nang kaliboan ka lawngon sa bakhaw ug ubang pasiunang hinabang. Silang Rama ug Gubalane nipasalig nga di nila pakyason ang dakong tabang sa mga Sugbuanon sa pagpalambo sa fish sanctuary sa Daan Paz ug kasilinganan.
* * *
Natultolan namo ang Daan Paz tungod sa paggiya sa bantogang environmentalist nga si Cebu City Councilor Nestor Archival. Kinsa maoy nirekomendar sa barangay nga makadawat sa gipasalig ni ABS-CBN Foundation Managing Director Gina Lopez nga hinabang nga di lang usa ka dasmag kun dili malahutayon.
Gipasabot ni Archival sa Kapamilya Runners nga nagtapok dinhi human sa lumba nga ang mga bakhaw gawas nga maoy itloganan sa mga isda mao say labing kasaligan nga panagang sa mga molupyo gikan sa bangis nga katalagman. Matud niya naggusbat ang bakhawan sa Daan Paz kay ang mga dahon gilawog sa kanding ug ang mga punoan gihimong sugnod.
* * *
Niangkon silang Mayor Rama ug Kapitan Gubalane nga human sa pagtisok sa bag-ong mga lawngon sa bakhaw magsugod ang mas dakong hagit sa paghunong sa tanang matang sa ilegal nga pangisda ug pagputol sa bakhawan. Nangandoy silang matabangan sa pagpamalit og mga bangka nga maka-patrolya ug makapanalipod sa fish sanctuary.
Nipasabot si Rama nga ang mas dakong hagit mao ang pag-edukar sa mga mangingisda ug ubang mga molupyo. Aron nga inay mopuo sila na ang manalipod sa mga bakhaw, mga isda ug ubang katigayonan sa kadagatan. Nanghinaot silang Rama ug Gubalane nga kining proyekto sa ABS-CBN Foundation makapukaw sa ubang local government units ug mga institusyon sa kadinalian sa panginahanglan pagpanalipod sa kinaiyahan nga maoy labing kasaligang tinubdan sa pagkaon.
* * *
Email: leo_lastimosa@abs-cbn.com