Dear Tito Miguel ,
Ako si Sabrina, taga Barangay Guadalupe, Cebu City. Lima ka tuig na ang relasyon namo ni John. Apan napungot nako, kay dili gyud siya maghisgot og kasal. Kun mo-open ko sa maong butang, moana raman siya uy, nga change topic . Feel nako, wala siya'y plano nga pakaslan ko. Sakto ba ang akong duda? — SABRINA
Sabrina,
Kun gusto gyud ka makahibawo unsa iyang plano, paminawa ang wala niya giistorya. Kun lima na mo ka tuig, sakto na sa pangidaron, duna nay klaro nga trabaho o panginabuhian, ug labaw sa tanan gihigugma ninyo ang usa’g- usa, unsa pa man tuod dugayan? Wala man kaha siya’y ginikanan o igsoon nga mahikawa’g suporta kun kasado na mong duha?
Kay wala man siya maghisgot sa kasal, gani molikay kun imo hisgotan, usa ray pasabot ana, wala siya’y plano. Gawas tingali kun siya dunay sikreto, sa uban kasado. O dili ba kaha dunay giandam nga surpresa. Masusi na nimo kun magpaabot ka. Hangtod kanus-a, ikaw ray makahukom ana.
Apan malipayon man kaha mong duha? Kun mao, padayon lang, tagamtama ang unsay naa ninyo karon. Dagha’g kasado mura na man nuo’g nakalaboso. Daghan ang nag-ipon lang o bisan gani’g uyab ra malipayon man. Dili garantiya ang kasal aron ka magmalipayon sa iya’ng kiliran. Pero kun di na ka malipayon kay wala na ka makuntento sa estado sa inyong relasyon, klaroha sa katapusang higayon kun duna ba moy kaugmaon. Kun mo-ingon naa siya’y plano apan wala’y petsa, tabla ra na nga ikaw mag-nganga. Kun molihay gihapon, ayaw na pugsa. Dugay na niya gipamulong kun asa mo padulong pinaagi sa iyang kahilom. Ang tawo nga tiunay kanimo nahigugma, adlaw adlaw hatagan ka’g garantiya, dili ka pasagdan mag-inusara sa kangitngit kun asa mo padulong duha. Lisod isulti nga ikaw iya’ng pakaslan, kun dili gikan sa iya’ng dughan. -Tito Miguel
Magpatambag ka? Ipada kang Tito Miguel: 0991-318-9366