Dear Tito Miguel ,
Maayong adlaw! Ako diay si Danaya, taga Labangon,Cebu City. Dunay nanguyab nako, ako siya gitarong og balibad gumikan kay wala koy feelings niya. Buotan baya siya,pero dili gyud siya ang tawo nga akong type. Ang problema nako kay bisan ako na siya nga gibalibaran, sige gihapon siya og samok-samok nako, dili daw siya mo-surrender. Unsa akong buhaton Tito Miguel aron mohunong na siya og panguyab nako? Samok na bitaw. —Danaya-
Danaya,
Basin huyang imo’ng pagbalibad. Kinahanglan klaro, tarong ug lig-on. Ka’y basin duna ka’y mga pulong o lihok nga mohatag kaniya’g paglaom. Labi na ka’y matud nimo buotan siya, basin sa kaluoy wala’y kusog imo’ng balibad. Posible ni-ingon ka buotan baya ka, apan di lang tika type. Sa pagsulti nimo nga buotan siya, lagmit nakakita siya’g buslot sa imo’ng pagminaut. Busa klaroha nga wala ka’y gusto niya, ayaw na sumpayi’g pagdayeg sa iya’ng batasan aron lamang dili siya masakitan, ka’y iya kini isipon nga pinahipi nga pagmahal. Kun klaro imo’ng pagbalibad apan siya nagpadayon, posible nahagit siya, labi na’g single pa ka. Pero ayaw sab panguyab para lamang siya mopalayo. Ayaw’g duwai ang emosyon sa uba’ng tawo batok sa nagsamok samok nimo.
Kun imo na gibuhat ang tanan pagpasabot niya nga kanimo wala siya’y mapaabot, apan sige gihapo’g gukod nimo, mahimo nimo ipaagi sa legal nga lakang. Wala nimo giklaro giunsa ka’g samok samok, kun mag sunod sunod, moadto sa inyo’ng balay, manawag ug motext kada karon ug unya.
Maski unsa iya gibuhat, kun kini nakasamok, nakairita o nakahasol kanimo, unjust vexation ang tawag niini sa balaod. Mahimo nimo isumbong sa otoridad, sa barangay o pulis o dili ba kaha modangop ka’g abugado aron magiyahan ka’g insakto.— Tito Miguel
Magpatambag ka? Ipada kang Tito Miguel: 0998-581-5856