Pabugnawa usa

Dear Tito Miguel,

Tagoa lang ko sa pangalang Emel, taga Pansoy Sogod, Cebu, 25 years old. Akong asawa grabe ka selosa. Karon, nakigbulag na siya nako. Akong kaproblemahan, iyahang dad-on among anak. Pwede ba pugnan nako, Tito Miguel?  Palihug tambagi ko. —Emel

Emel,

Kun sigurado na mo magbuwag, ang kustodiya na lang sa mga bata ang ato hisgotan. Kun sila siyete anyos paubos, ngadto sila sa inahan. Mao kini ang balaod, gawas kun ang inahan wala’y katakus, duna ba kaha’y sakit nga makatakod o bisyo sama sa droga nga delikado sa ila’ng kahimsog o kaluwasan. Busa dili nimo mapugngan kun dalhon sa ila’ng inahan. Apan dili pasabot di na nimo sila makit-an. Duna ka’y katungod moduaw sa mga bata o mogawas kuyog sila. Kun ang mga bata lapas na sa siyete anyos, sila ang makahukom kun mokuyog sa inahan o magpabilin sa amahan. Duna gihapo’y katungod mobisita ang wala pili-a.

Kun dili mo magkasinabot sa kustodiya, dangop sa barangay aron kamo mahusay. Kun dili gihapon, sang-at mo sa korte kansang huwes mao’y modesisyon kang kinsa maadto ang mga bata – sa pinakamaayo moatiman ug mopadako nila. Konsulta’g abugado aron sigurado, ka’y basin nasayop ko.

Pag-istorya mo’g tarong para sa ila’ng kaugmaon. Pero lagmit imo’ng asawa naglungot-lungot pa, dili tarong ka-istorya. Palabya usa ang panahon aron siya mobugnaw na. Maski dalhon niya karon inyo’ng mga anak, mosangpit gihapon kanimo alang sa pinansiyal nga suporta, gawas kun taas siya’g garbo o wa magsalig nimo. Diha na ka mo-entrada ini’g dangop niya. Hisgoti unsao’g bahin sa kustodiya. Wa ka kahibawo, kalit ra mo mag-uli duha, wa man kaha’y basehan iya’ng pangabubho gawas sa iya’ng imahinasyon. Kun di na magparamdam o kanimo dili makig-istorya, buhata ang legal nga pamaagi paghusay sa kustodiya. —Tito Miguel

Magpatambag ka? Ipada kang Tito Miguel: 0998-581-5856