Tito Miguel

Dear Tito Miguel,

Maayong adlaw kanimo! Tawga lang ko'g Janissa, 30 anyos ug dunay live in partner sulod na sa lima ka tuig. Aduna nami 3 year old nga anak.

Problema ko kay iresponsabli akong partner. Hangtud karon walay trabaho. Nagsalig rami sa allowance gikan sa akong mommy nga nurse sa abroad. Nagpuyo ra sab mi's balay sa akong mommy.

Nagtinda-tinda ko diri sa amoa og homemade goodies. Wala gyu'y support akong partner. Dili gani mobantay sa among anak, hinungdan nga usahay madaot akong goodies kay mabiyaan nako inig himo aron lang bantayan among anak.

Gikapoy nako, Tito Miguel. Akoa tanan trabaho sa balay. Akong partner wala ra gyu'y pakabana. Unsaon ko ni? —Janissa

Janissa,

Undang na sa pagtawag niya’g partner kay tataw nga dili nimo siya kapikas sa kinabuhi. Kun wala’y trabaho puwede pa mapasaylo kay nihit karon ang higayon. Apan ang iyang pagdumili pagtabang nimo sa negosyo, sa mga bulohaton sa balay ug pag-atiman sa inyong anak diha ka nasugamak.

Mura’g di pa ka andam mobiya kaniya kay imong pangutana unsaon siya. Gamay ra kaayo ang purohan nga siya mausab kay nakakaplag ka’g matang sa tawo nga wala’y kaikog magpabuhi nimo ug sa imong inahan. Sige lang, maski unsa kagamay ang purohan, maayo gihapon suwayan.

Istoryahi siya unsa iyang plano para sa inyong kaugmaon, dili kinahanglan kasal ang padulngan, kun dili unsaon niya’g amuma iyang pamilya. Apan pagmatngon sa imong mga pulong. Likayi nga imong tuno mura’g maningil niya aron dili mainsulto ug mahimong depensibo. Sa imong pagpangutana unsa iyang plano, sumpayi dayo’g pasalig nga ikaw motabang ug magpaluyo. Kun dunay plano, suportahi hangtod hingpit nga matuman.

Kun wala siya’y plano o kun duna man way klaro matuman ba’g makalaboso, biya na samtang sayo. Siya ang matang sa tawo nga dili molihok labi na dunay lain nibarug sa iyang katungdanan. Total batan-on pa ka ug dili mo kasado. Kun nahigugma pa ka niya, mag duha duha ka.

Apan sa kadaghan sa imong reklamo niya, usa ra’y buot pasabot ana. Dili igo ang imong gugma nga gibati, labi na kay duna moy anak, kinahanglan kini kuyogan sa respeto, suporta ug responsibilidad. Kay kun natagbaw pa ka sa gugma nga imong gibati para niya, kining tanan nimong reklamo natabunan ra unta. Wa man gani klaro kun gihigugma ba sad ka niya. Kun duna man, sa lihok iyang gugma dili paigo. Biya na. Dili ka moabot sa paraiso kun kuyog nimo parasito. —Tito Miguel