Tito Miguel

Nawad-an nako’g gugma sa akong kapuyo. Napuno nako sa iyang mga saad nga puros wala natuman. Sige’g pangatik nako. Gikapoy nako.

Tawga lang ko og Lotta, hingkod na ang panuigon ug may usa ka anak. Nakahuman mi’g culinary sa akong kapuyo. Nikuha pud ko og caregiving ug maka abroad na unta ko last year kun naka graduate pa gyud ko. Wala ko katiwas kay ang kwarta nga bayad unta sa exam, gihuwam sa akong kapuyo kay gibayad sa iyang giutang nga motor. Nisaad siya nga bayran pero atik ra gyud.

Wala siyay trabaho. Sige ra’g ingon mangaplay siya online pero sige ra diay og games. Dili gyud magpa distorbo. Akong amiga sige’g ingon nga buwagan nako akong kapuyo kay wala gyuy ayo. Sige ko tando, pero dili man nako mabuhat. Ambot ngano.

Palihug tambagi ko.

Lotta

* * *

Lotta,

Ubay ubay ang nagtiyabaw nga rason nga angay na ka mobiya sa imong kapuyo nga wala’y ayo. Inay nga moabaga, mobitad nimo paubos. Ang kapuyo o kapikas angay motabang nimo, kun dili niya mahimo sa pinansiyal nga paagi kay wa siya’y trabaho, mobawi unta siya sa emotional nga suporta ug hatagan ka’g pasalig nga kaniya ikaw makasandig. Kapikas gani, buot pasabot tunga mo sa tanang maagihan sa kinabuhi.

Dili pa gyud mo kasado, busa wala ka’y ilabay nga sagrado. Apan naghisgot ka nga duna ka’y anak. Ninyo duha? Kon imo anak sa niaging relasyon, wala ka’y angay anugnan niya isip amahan. Apan kun anak-inyo duha, kinahanglan i-konsidera nimo ang epekto sa bata sa imong laraw. Timan-i lang nga dili sad maayo para sa bata ang padak-on ubos sa inyong sitwasyon, nga naa tuod amahan pero dili moatiman.

Apan labaw sa tanan, wa na ka mahigugma niya. Busa wala na’y rason nga magpabilin ka. Ang imong problema ngano di ka kabiya. Lagmit kuyawan ka mag-inusara.

Dugay na ka’ng nag-inusara kuyog niya kay di ba gipasagdan ra ka? Tingali hadlok ka unsa’y mahitabo nimo ug sa imong anak. Dugay na nga ikaw ra ang nagdala sa inyong kinabuhi duha. Ang imong kapuyo tawo tawo ra.

O dili ba kaha nahadlok lang ka sa umaabot. Fear of the unknown. Apan hinumdomi ang matang sa iyang pagkatawo wala ka’y mapaabot. Posible sad ikaw ang klase sa tawo nga makuntento ra sa naandan ug mahadlok mosimang. Comfort zone. Ayaw katagbaw sa imong naandan ug sitwasyon kuyog sa kapuyo nga sige lang ka’g kasagmuyo. Biya na karon, sa di pa ka biyaan sa higayon.

Tito Miguel

* * *

Alang sa inyong mga suliran nga buot ninyong patambagan kang Tito Miguel, -i-like ang Banat Hugyaw ug Banat News fb pages aron adto ninyo kana ipadala ug mogawas matag Lunes ug Biyernes.