Tito Miguel

Dear Tito Miguel,

Good day!! Ako si Janis, minyo ug taga Sogod, Cebu. Akong problema, mahitungod sa kadugo sa akong husband. Mga joker kaayo ni sila. Okay raman unta nako pero, nigrabe naman sila ka sungogan pagka pawong sa ABS-CBN. Tabangan ko nila'g sungog sa among family group chat. May pa himuon na lang kunong quarantine facility ang mga estasyonan sa ABS-CBN. Daghan pa kaayo sila'g sungog nako.

Dili rako motubag, or mo react. Akong giingnan akong bana nga wala nako kauyon sa mga sungog, pero niingon siya nga dili na lang kuno patulan aron dili na modako. Dili sab ko ganahan mohawa sa among group chat kay dili ko ganahan moingon sila nga weak ko, or nagbinata ko. Pero, madutlan ug masakitan man ko sa ilang mga sungog gud.

Unsaon ko ni, Tito Miguel? —Janis

Janis,

Ayaw’g hawa sa group chat, apan ayaw na sa’g sulod. Kun madutlan ka sa sungog, ayaw na lang tan-aw sa ilang mga chat nga puno sa kantiyaw.  Ayaw kabalaka unsa ilang hunahuna ngano wa na ka pakita sa group chat, kay ikaw ra’y alkanse sa duwa nga pambata. Pasagdi sila unsa ila hunahunaon, basta ikaw malinawon.

Ang pagkawala sa imong paborito nga istasyon sa kahanginan usa ka legal, political, social ug economic issue. Dili lang kini mahitungod sa kalingawan, mabaw ra kaayo na. Daghan pa’y laing issue nahilambigit ani nga basin gani ang uban wa pa mahisgoti. Kun ilang yagayagaan ug himuon nga kataw-anan, nisimang na sila sa seryoso nga hisgotanan.

Ayaw pag-usik sa imong panahon pakiglalis sa mga tawo nga sirado na ang alimpatakan. Kay maski unsa kamaayo imong punto, dili sila maminaw kay duna na sila’y gituohan. Ayaw’g lungot-lungot sa mga tawo nga di makasabot sa imong buot ipaabot.

Gani para nila, ing ana sad ka, sirado’g utok mao nga di kasabot. Mao nay lalis nga di magdaog kay hugot na ang baruganan ug gituohan sa mata’g usa. Mura’g relihiyon, dili angay lalison, kun dili imo lamang dawaton.

Kun kinsa ninyo ang naa sa insakto nga baruganan, panahon ray makatubag sa tanan. Pag-atang na lang kun mobalik pa ba sa kahanginan imong paborito nga kalingawan. Kun ugaling mobalik man, ayaw bawos nila’g kantiyaw kay ang mananaog dili angay manungog, buhat na sa mga hungog.    

Tito Miguel