Kapuslanan

“Ma, unsa pa may kapuslanan nga moadto pa man ta’s akong amahan nga patay na? Kaniadto magsigi ka’g ingon nako nga buhi pa akong amahan. Apan kay wa niipon nato, gipakasama na lang nato nga patay na,” ni Rusell, 7 anyos. Inosenteng nangutana sa iyang inahan samtang naglawig ang barko ilang gisakyan gikan sa Tagbilaran padulong sa dakbayan sa Sugbo. Kasamtangang gihaya si Ernie sa ilang balay sa lungsod sa Sibonga. Sa Facebook na nahibaw-i ni Loida nga nadisgrasya iyang bana sa motorsiklong bag-ong pinalit.

Nasayran ni Rusell gikan sa iyang mama, nga human sa ilang kasal, tulo ka bulan ra niistar si Ernie sa balay sa ginikanan ni Loida sa Tagbilaran. Nananghid nga molarga na kay nadawat iyang application pagka-oiler sa barko biyahe’g gawas sa nasud.

Nahimugso si Rusell nga way namat-ang amahan. Kay wa na gyud nibalik si Ernie sa Tagbilaran. Nabalitaan na lang ni Loida nga niuli og Pilipinas si Ernie. Apan tua sa Sibonga puyo. Nakighugoyhugoy sa mga barkada. Dangta’g tulo ka tuig, nipasaka si Loida og kaso nga declaration of nullity of marriage. Kay may foreigner nga gustong mangasawa niya. Wa na man sab siya’y mahimo. Kay tataw nga iyang bana wa nay gusto niya.

Nakabuhig lawom nga panghupaw si Loida, tungod sa pangutana sa anak. Nakapanglantaw sa lawod ning sayong kahaponon. Ug namulong “Anak, di pa ka kaayo kasabot karon kay bata ka pa. Apan mao ni akong tubag. Agi’g respeto sa imong lolo nga biyudo na, amahan sa imong papa, ug sa mga uyoan ug iyaan nimo, mga igsoon sa imong papa. Silang tanan maayo’g gawi. Maayo’g kinaiya. Gidawat ko nila nga tipik na sa ilang pamilya. Gipakita nila nako, ug gipabati nila nako, human gyud sa kasal namo ni papa nimo. Naa ni papa nimo ang depekto”, ni Loida.

Dugay’ng nitutok si Rusell sa iyang inahan nga tupad lang niya’g lingkod sa teheras. “Ok ma. Gusto sab kong makahimamat ni lolo ug sa akong mga tiya ug tiyo” ni Rusell. “Salamat anak sa imong pagsabot” ni Loida. Nakapahiyom na sab. Alcea Maningo - Cangyan, Carmen, Cebu