Domingo sa hapon. Gilaylay ni Paul ang awit nga ginama ni Ben Zubiri nga nag-ulohan og Matud Nila, samtang naglakaw siya padulong sa balay ni Terry sa barangay Dakit. Alang kaniya wala nay babag sa iyang gugma nga iyang ihalad kang Terry.
Apan nahunong si Paul sa iyang paglaylay diha nga nakita niya ang daghang tawo sa panimalay ni Terry. Mikurog ang iyang dughan sa kabalaka.
Iya na lang nasayran nga may namaye ni Terry. Si Raul, ang kahigpit niya nga karibal. “Wala man mosaler ang imong gimik, Paul,” ni Vic nga nagkatawa.
Kayugot ang gibati ni Paul sa iyang nadungog ni Vic. Ang nahitabo sa panimalay ni Terry wa’ damha ni Paul. Naglagot ‘sab siya ni Vic nga wa’ mopahibawo kaniya nga imbitado kini ug diha na sa iyang pag-abot.
“Suod kita’ng higala, Vic, pero wa ko nimo sultihi,” mahay ni Paul.
“Dili ko gusto nga sakitan ka, Paul, nahibawo ko sa dako nimong gugma ni Terry,” pasabot ni Vic.
Wa’y pagtuo si Paul nga molahutay si Raul sa iyang gugma ni Terry. Nakita na niya ang talaw ni Raul sa iyang pagpamisita ni Terry.
Nagkatawa si Paul nga naghandom sa gihimo niya nga binuang matag pamisita ni Raul kang Terry.
“Dili na kadto mamisita si Raul, Vic. Pag-uli niya gika’ng namisita ni Terry, akong giuyog ang kasagbutan, misutoy sa pagdagan,” tug-an ni Paul nga nagkatawa.
“Baga g’yud ka’g kabuang, Paul,” ni Vic. “Unsaon nga lihay man kaayo nako, si Terry,” pasabot ni Paul.
Miabot ang laing Domingo. Nakita ni Paul nga namisita na ‘sab si Raul ni Terry. Sa dihang mipauli na si Raul, giatangan ni Paul ang agianan ni Raul nga nagsul-ob sa dagway’ng baboy. Naglakaw sama sa baboy nga may bakya ang tiil ug kamot.
Puwerte nga nakadagan ni Raul balik sa balay ni Terry. Nahimuot si Paul sa nahitabo. Ug sa balay ni Terry nakatu’g si Raul.
“Nahibu’ng ko, Vic, ngano nga namaye si Raul?” sukna ni Paul.
“Sa dihang natu’g si Raul sa balay ni Terry, wa ang ginikanan ni Terry. Ila ang panahon. Bangunon ni Raul ang dungog ni Terry, kay buntis man,” giingnan ni Vic si Paul.
Nakapanglingo si Paul ug gianugonan siya sa iyang nagasto sa saput nga aron mahimo siya nga anay nga nagbakya apan wa’y kapuslanan. (Kataposan)