“Wala ka g’yud diay makasuway og bayle Lyn?” gisukna ni Kenn ang dalaga samtang diha sila daplin sa baylehan. Milingolingo si Lyn ug mipahiyom. Misamot ang kaibog ni Kenn ngadto sa dalaga.
Giagni ni Kenn si Lyn nga manayaw sila. “Tudloan tika’g sayaw Lyn. Inighuman nato og sayaw, manggawas lang ‘sab ta dayon,” giingnan ni Kenn ang dalaga. Wala dayon motubag si Lyn.
“Dili kaha ko kataw-an sa mga tawo Kenn?” matud ni Lyn nga mura’g talisugot na nga manayaw sila ni Kenn. Tuod, dihang gipatugtog na ang sonata nga Please Love Me Now ni Eddie Peregrina, giagni pag-usab ni Kenn ang dalaga.
“Tana, manayaw ta Lyn,” matud ni Kenn nga migunit dayon sa kamot sa dalaga ug gibitad kini paingon sa tunga sa baylehan. Nakapahiyom ang mga higala nga sila si Clemen ug Alice pagkakita nga misayaw na si Lyn.
Mainampingon nga gigakos ni Kenn si Lyn ug gitudloan ang dalaga kun asa niya ipahimutang ang iyang kamot samtang magsayaw.
“Kun dili ka gani gusto nga mapiit paggakos sa usa ka lalaki, anhi nimo ibutang ang duha nimo ka kamot, imong ipaod sa dughan sa lalaki aron nga kun piiton ka, imo nga mapugngan,” matud ni Kenn.
Mipahiyom si Lyn nga namati kang Kenn. “Apan kun makagusto ka sa lalaki nga nakigsayaw nimo ug mosugot ka ra nga piiton sa paggakos, ang imong duha ka kamot anhi nimo itungtong sa kilid sa iyang abaga,” dugang ni Kenn. (Sumpayan)