Gibati ni Jeffrey ang talagsaong kalipay diha’ng sa hamubo nga higayon nag-ukobay ang masig nila ka mga ngabil ni Janeth. Naputol ang ilang pagparayganay diha’ng mi-Go na ang signal.
“Basin baya og makaingon ka nga easy ra kaayo ko nga pagka babaye ha kay misugot ra dayon nimo?” may kabalaka apan paraygon ang tingog ni Janeth ngadto sa ulitawo nga nagmaneho sa gisakyan nila’ng Strada.
Mapahiyumon kaayo si Jeffrey ug ganado kaayo nga mimaneho sa sakyanan paingon sa beach sa Compostela nga adto sila mag-night swimming. “Hala!” kalit nga nabuhian ni Jeffrey ang pulong.
“Naunsa ka Jeff?” sukot ni Janeth kaniya. Nakapanglingo-lingo si Jeffrey. “Naunsa ka uy,” follow-up nga pangutana ni Janeth nga gibati’g kabalaka. “Mag-night swimming ta apan nakalimot man diay ko pagdala’g ilisan,” matud ni Jeffrey nga nakapahiyom samtang naglingo-lingo.
Nakapangutkot si Jeffrey sa iyang ulo. “Basin dunay paabangan nga bathing trunk didto sa Stakili… pag-abang na lang,” matud ni Janeth. “Mao g’yud kun wala gani, dili ko makaapil ninyo nga maligo,” ni Jeffrey.
“Dili mahimo nga dili ka mouban namo’g kaligo uy. Pag-brief na lang gud kay dali ra bitaw na nga mauga,” tambag ni Janeth ngadto sa ulitawo. Nahuna-huna ni Jeffrey nga nipis ra ba kaayo ang iyang brief ug kun kini mabasa, maklaro g’yud ang iyang tinagoan nga armas.
Pag-abot nila sa Stakili Beach, miabang dayon sila’g cottage. Nagpabilin ra si Jeffrey sa sakyanan. Taud-taod, mibalik kaniya si Janeth nga nagtapis na og tualya ug matataw kaayo nga nagsul-ob na sa iyang bathing suit. (Sumpayan)