Nalipay kaayo si Janeth diha’ng giingnan ni Jeffrey nga moamot siya’g litson sa ilang night swimming. “Yehey! Ingnon nako ang akong mga barkada. Ari na lang ta magkita unya sa gate sa UC kay magdala na man ko daan og sinena,” giingnan ni Janeth ang ulitawo.
Tuod, gikontak dayon ni Jeffrey ang Ayer’s Lechon nga gipanag-iya sa higala niya nga si Ariel Palcuto. Gipasaligan si Jeffrey nga kagumkom nga litson ang ihatag kaniya ug i-deliver kini sa iyang opisina sa P. del Rosario. Nakahuna-huna si Jeffrey nga magkinahanglan siya’g sakyanan.
Gitawgan ni Jeffrey ang suod kaayo niya’ng higala nga si Paquito, tag-iya og car display center, ug gitug-anan nga nanginahanglan siya’g sakyanan. Wala mosipyat si Jeffrey kay pahuwamon siya ni Paquito og Mitsubishi Strada. Giadto dayon ni Jeffrey ang display center ni Paquito ug gikuha ang sakyanan.
Mibalik si Jeffrey sa iyang opisina sa P. del Rosario apan diha ra magpaabot sulod sa sakyanan nga giparking niya sa parking area. Gitan-aw niya ang iyang relo, alas singko pa sa hapon, klase pa karon ni Janeth.
Sigurado nga malipay si Janeth nga iyang hapiton sa tunghaan ug pasakyon tupad kaniya sa hinuwaman niya’ng sakyanan. Mitingog ang message alert sa cellphone ni Jeffrey.
Kawani diay sa Ayer’s Lechon ang nanawag nga nagpahibalo nga coming na ang gi-order nga litson ni Jeffrey. Wala tuod madugay, diha na ang nagmotor nga nag-deliver sa litson.
Igo lang g’yud nga nakabiya ang nag-deliver sa litson, mitingog na usab ang cellphone ni Jeffrey. Si Janeth maoy mi-text nga wala moabot ang ilang maestro mao nga sayo sila’ng mogikan paingon nga mag-night swimming. (Sumpayan)