Kaliwat og ungo sila si Mancio kay ang ilang apohan nga si Eliseo namatay sa bato. Gitabangan og bato samtang nagtuwad sa may dalan paingon sa baybayon. Ang igsuon niining si Mangkoy milayas ug wala igdungog.
Pero kini si Mancio nagpabilin dinhi sa sityo Tubod-Tin-aw. Bag-o pa lang siyang naminyo ug ang iyang napangasawa mao si Florlinda nga anak nilang Torang-Pitoy nga dunay tindahan sa tuba didto sa eskinang gamay. Dihang nanganak si Florlinda labihan ang kalipay nga gibati ni Mancio kay maoy iyang nakita ang gidak-on sa kinatawo sa puya. Puya pa gani maila nga lahi gyud og kinatawo ang ilang panganay nga si Sebio.
“Flor, kakita ka, haskang dakoa sa buhi sa atong anak, puya pa gani,” ni Mancio pa ngadtong Flor.
“Bitaw, uy, asa man ni siya maliwat, Mancio?” mura’g dunay buot tinuon si Florlinda sa ganay sa iyang pangutana.
“Aw, asa pa maliwat di adtong lolo Eliseo,” ni Mancio pa.
“Unsa, kadtong imong apohan nga mangtas, mao ba?” mura’g naglagot si Florlinda. “Mangtas gud tawon, tabitabi ra na nila, uy.”
“Tabitabi gud, ungo gyud mo’g kaliwat.”
Mipahiyom si Mancio. Wala siya masuko kay alang niya tinuod man pud nga kaliwat sila’g ungo. Siya gani, mura ma‘g ganahan magsuroysuroy sa gabii apan iya lang kontrolon ang iyang hunahuna.
Tuod, dihang naulitawo na si Sebio daghan kaayo kini’g uyab. Unya, nadungog dayon nga daghan kaayo kini’g gipaangkan. Kinse na ka buok ang iyang gipamabdosan. Ug suwerte lang kay wala’y bisa’g usa ang nangahas nga nagsamoksamok kang Sebio. Buot na lang pud ang gipamaangkan niya nga wala’y matawag nga amahan ang ilang mga anak.
“Tan-awa, Flor, tungod sa gidak-on sa buhi sa atong anak, gukdunon siya’g mga babaye,” ni Mancio pa nga medyo hamtong na ang bayhon ug pangidaron.
“Saba diha, oy,” nangyam-id si Florlinda. “Unsa, garbo kaayo ka ana, nga ang imong anak dako’g buhi ug unya daghang gipaangkan?”
Mitingsi si Mancio. Unya, usa ka gabii, dunay gibalbal ug ang gibalbal usa ka biyuda. Halos, napulo na ka mga biyuda dinhi sa sityo ang gibalbal. Ug kay abtik man ang mga tanod nadakpan ang mangtas nga ungo ug kini mao si Sebio.
“Sunogon si Sebio ungo, i-apil pud ang iyang amahan nga si Manciooo!” singgit sa mga silingan. Apan, kahibulongan, kay pagka-ugma wala na sila si Mancio ug Sebio. Nakaikyas si Sebio kuyog ni Mancio ug Florlinda. (Kataposan)