Dear Tita Salie,
Have a wonderful day. Just call me Genggeng, 23 years of age. Duna koy usa ka anak apan dili pa kasado sa amahan sa akong anak. In short nagpuyopuyo lang mi.
Ang akong partner nag edad og 23 anyos. Buotan man unta siya apan buangon lang panagsa. Nagbinuang ni siya sa una apan ako lang gidawat kay nangayo man siya og pasaylo.
Karon maglagot ko niya kay mokalit lang og lakaw kuyog sa iyang barkada. Unya kun maglagot na ko niya ako dayong mahinumdoman ang iyang gibuhat nga binuang sa una.
Naglibog na ko unsay akong buhaton kay dili man gyud mawala sa akong hunahuna. Palihog pasabta ko, Tita Salie. Thank you and more power.
* * *
Good day. Kun nangayo na og pasaylo ang imong partner ug iya na nga giangkon ang iyang sala nga nahimo ug kun imo na usab siyang gipasaylo, paningkamoti nga dili na nimo kini huna-hunaon pagbalik ug andam ka nga mohatag kaniya og laing kahigayonan.
Tinuod nga dili nimo malimtan ang iyang gibuhat nga sala, apan dili usab maayo nga kanunay lang nimo huna-hunaon kay ikaw ra gihapon ang makaluluoy ug ikaw ra kanunay ang masakitan.
Kun naningkamot na siyang dili na makasala sa samang sayop, be fair sad sa iyaha. Maoy huna-hunaa nga nag-usab na siya, ayaw hunahunaa nga hangtud karon mao lang gihapon. Ug hatagi usab siya og panahon aron maka-relax ug makalulinghayaw aron dili siya molayat sa inyong koral. – Tita Salie