“Sori kaayo Marie, wala nako tuyoa,” matud ni Norman nga puwerte’ng nakapangayo’g pasaylo human mabag-id ang iyang wala nga bukton ngadto sa duha ka nagtuybo nga mga bungtod sa dughan sa babaye.
“Walay problema uy, dili ba giingnan man ko nimo ganina nga ingon ana man g’yud, masaghiran man g’yud ang student driver sa instructor,” matud ni Marie. Nahinangop si Norman nga wala diay ikasuko ni Marie nga nasaghiran sa instructor ang iyang dughan.
Gipadayon ni Norman ang pagtudlo ni Marie. Milanat og mga tulo ka oras ang ilang pagbansay-bansay ug nakabantay si Norman nga maayo na kaayo momaneho si Marie sa sakyanan. Lapas sa alas 12 sa udto, nangaon sila si Marie ug Norman sa usa ka kan-anan.
“Nalingaw kaayo ko sa atong driving lesson karon Norman. Ugma, bag-ong sakyanan maoy atong gamiton sa praktis. Mopalit ko karon og bag-ong kotse aron mao na ang akong bansay-bansayan,” matud ni Marie.
Nakalitan si Norman sa iyang nabati. Wala siya magtuo nga ingon ba diay niini kakuwartahan si Marie nga yano-yano lang moingon nga mopalit siya’g bag-ong sakyanan. Wala gayud sipyata ni Marie kay nagpa-deliver dayon siya og bag-ong kotse gikan sa Nissan Motors.
Pagkaugma sa buntag, mibalik si Norman sa balay ni Marie nga wala na magdala sa training vehicle sa driving school. Napasiga na lang ang mga mata ni Norman nga nakakita sa bag-ong kotse nga diha giparking sulod sa compound sa balay ni Marie.
Misugat si Marie kang Norman nga mao pa’y pagsulod sa gate. Nagngisi si Marie nga misugat sa driving instructor. “Nindot ba ang gipalit nako nga bag-ong kotse?” gipangutana ni Marie si Norman.
Nanakay sila sa kotse, si Marie na ang nagmaneho niini paingon sa north reclamation area. (Sumpayan)